Өлең, жыр, ақындар

Базардағы әйелдер

  • 31.08.2018
  • 0
  • 0
  • 2733
Құндағынан адал туған ұлға зар
Жер-Ананың бір мысалы бұл базар.
Алыңыз да алыңыз деп тұрғандай
Біздің жаққа аударылып кіл назар.
Құн тұрақсыз, теңге деген сиқырлы,
Тектілікті тұралатты тұрқы үлгі.
Ханым, саламатсыз ба, неге сіз
Сұлу жүзбен қорландыңыз бір түрлі?
Сіздің тана көзіңізде сұмдық бар.
Сұмдық мұңнан тұратындай құрлықтар.
Қалпағыңыз жарасып тұр шілтерлі,
Шілтерінен тарқалады шындықтар.
Ханым, сіздің даусыңызда дарын бар.
Затыңызды алып жатыр нар ұлдар.
Нар ұлдардан түңілдім мен намыссыз,
Жәбірленіп қарағанда ханымдар!
Мына заман — бір қауесет, бір аңыз.
Ханым, сіздің сіңіліңіз-ау мына қыз...
Қап арқалап келе жатыр қайысып,
Қап ішінде — елдік ұят, күнәміз.
Сіңіліңіздің бар сияқты бөпесі.
Бөпесінің жоқ сияқты көкесі.
Бөпесіне сүт беретін мезгілде
Жүк көтеріп келе жатқан беті осы.
Ханым, сіздің орыныңыз бұл емес.
Айналаңыз хош иісті гүл емес.
Көңіліме секем алдым елді ойлап,
Енді көңілім еркін құстай түлемес.
Секем алдым. Сейілмеді сұр тұман.
Сұр тұманнан суырылып бұлқынам.
Кімдерге олжа — тұтас ұлтты айыру
Уызынан, тамырынан, ғұрпынан?!
Қазағымның шаңырағында кие мол.
Қасиетінен айырғанды сүйе ме ол?!
От Анасы, ошағыңа орал сен,
От Анасы, бесігіңе ие бол!!



Пікірлер (0)

Пікір қалдырыңыз

Көктем. Көктеректер

  • 0
  • 0

Бұл көктемді алты ай қыс күтіп едіңдер,
Осылай басталады екен бүкіл өмірлер.
Тал, теректер, түн бойы толғақ қысып,
Бебеу қағып, ыңырсып, уһіледіңдер.

Толық

Жақсылықтың бағасы

  • 0
  • 1

Бітер емес сағынышым,
Сезім неге жомарт тым?
Бір бақытты табу үшін
Бір бақытты жоғалттым.

Толық

Қыздарға

  • 0
  • 0

Шақырып алдан шың-құздар,
Бәйгеге қосты мені елім.
Саламатсыңдар ма, жан қыздар,
Жаныма тілектестерім!

Толық

Қарап көріңіз

Басқа да жазбалар