Құм суреті – Марфуға Айтқожина

Қиыр-қиыр, қиыр құм,
Сұр жыландай иір құм.
Қадау-қадау сексеуіл,
Буын-буын бұйырғын.
Қиыр-қиыр, қиыр құм,
Қиыры жоқ шиыр құм.
Қабат-қабат, қабат құм,
Қатпарыңдай миымның!
Төбе-төбе, тәбе құм,
Кеп жасаған көне құм.
Өзіңе ұқсап жанам да,
Өзіңе ұқсап сөнемін!
Көше-көше, көше құм,
Қалтарысы неше мың...
Өзіңе ұқсап қонам да,
Өзіңе ұқсап көшемін!
Таңдай-таңдай, таңдай құм,
Сызығындай маңдайдың.
Өзіңе ұқсап мен-дағы
Ай нұрына қанбаймын,
Күн нұрына қанбаймын!
Жапан түзде көлбеген
Жатқан нардай көлденең,
Аптабында шілденің
Мен де өзіндей шөлдегем.
Махаббатқа шөлдегем,
Шапағатқа шөлдегем,
Адамдыққа шөлдегем,
Адалдыққа шөлдегем,
Шөлдегем, мен шөлдегем,
Қиыр-қиыр, қиыр құм!