Көздер

Көздер бар жанды нұрға толтыратын,
Сол көзден, тап сол көзден толқыр ақын.
Көздер бар, әрі ойлы, әрі мұңлы,
Тұңғиық тереңінде көл тұнатын.
Көздер бар сиқырлы бір арбайтұғын,
Жарқ етсе, шұғылалы таңдай түнің.
Көздер бар ыстық жанды қалтыратып,
Ызғары тұла бойды шарлайтұғын.
Көздер бар қарап қана қалдыратын,
Көздер бар —
Көз біткенді талдыратын.
Өшпес екен, сол нұрлы,
Отты көздер,
Орап ап жалынына жандыратын.

---