Жат елде

Өсіппін мен, сонау алыс — жат елде,
Өмір жолы жүріп барып, бұрылды.
Байласам да бұл өмірді қатерге,
Ата жолын қуған екем бұрынғы.
Тілегім шын орындалды, сендемін,
Азап жылдар қалды артта бұлдырап.
Мен тегінде зор үмітке сенгенмін,
Кеше ғана арман еді-ау, бүл бірақ.
Кезетінмін тау-тасыңды аралап,
Қиялменен қалсам бір сәт кезіге.
Тағдыр менің жүрегімді жаралап,
Болып еді, көп мұң айтқан кезі де.
Көргендерім енді міне ұмыт боп,
Белесі көп өмір жолы басталды.
Сан армандар құшақтайды күйіп кеп,
Шуақ күндей жадыратқан аспанды.

---