Әр қазаққа айтамын

Қазақша оқы! Қазақша мені ұғамын десеңіз,
Қазақша ойла! Қазақша мені ұғамын десеңіз!
Қазақша ойлап, қазақша оқысаңыз сөзімді,
Бірге туған бауырдай туыстыққа көшеміз.

Таза ана тілінде сөйлесейік бірігіп,
Шұбарламай сөйлесу өте асқан ірілік!
Ұмыт болған сөздерді жадымызда жаңғыртсақ,
Өліп қалған ата-анаң келгені ғой тіріліп!

Өзге тілде ойласаң, өз тіліңнің өлгені,
Тілің өлсе басыңның қадірі жоқ төрдегі!
Ұйқысынан шыңғырып оянады жас сәби,
Дәретімен былғанса астындағы жөргегі.

Тәуелсіздік алғасын өзгерер деп ойлап ем,
Дертімізге асқынған 25 жыл болмады ем!
Санасында бар қазақ болса егер төңкеріс,
Қуаныштан сонда мен....

Май шам болып әр үйде жағылатын шығармын,
Ауырғанда жаныңнан табылатын шығармын.
Ұйқысынан оянған жанартаудай сол күні,
Жүрегінде қазақтың жарылатын шығармын.

Жанартаудай атылып от-жалынға көмермін,
Лавадай жырларды түйдек-түйдек төгермін.
Алпыс екі тамырды қорғасындай балқытып,
Танытармын осылай құдіретін өлеңнің!!!

---