Оян, жастар – Балым Мамутханова

Оян жастар, көзіңді аш, ерінбе
Қазақпын деп, құр мақтанба, елім деп
Сөзбен көкке көтермей елдің атын
Сауат ашып, білімге жақын тартын

Құр сапырмай су тәрізді күніңді
Күлсең күліп, қағазға шақ мұңыңды
Миллиардтаған кітап барда, жер барда
Төрт қабырғада отыруға бола ма?

“Инстаграм” мен желінің пайдасы не
Көзін ашпай, халық соған берілсе?
Арын сатып, тәнін сатқан қаракөз
Сол желіде танымал боп, желпінсе?

Бүгін барлық қазақ шеттерінен патриот
Жүрегінде жанған оның жалған от
Қазақпын деп керіп кеуде мақтанар
Жетістігін айтқанда ол шаттанар

Қазақ болсаң, сол сөзіңді дәлелде
Кеуде қақпай, ойлап шығар әлдене
Өзгенің көзінде кір байқайсың
Өз бойыңың шірігенін айтпайсың

“Ұят қайда, намыс қайда?!”-деген жұрт
Өз елінің арасына салар құрт
Елім деп еміренген жастар жоқ,
Бетперделі патриот пен надан көп.

Өзін ғана ойлаған бұл заманда
Бос сөз де көп, өтірік те, жалған да...
Қысқа етек, боянған бетке болар ғашық
Имандылық, ибалылық айтып алып.

Оян, жастар, ояна гөр, көзіңді аш
Бұл түнекте тізе бүкпей жолын тап
Не кедергі тұра қалып күресуге?
Өмірдің шын ләззатын бір сезуге

Машық тап, бір іспенен айналыс
Өмір деген үздіксіз бір қарбалыс
Тіл үйрен, еңбек етіп, ет жина
Жаңа білім құя бергін миыңа

Не кедергі саған әлемдегі ұлылардай болуға?
Не кедергі, орыныңды таба қап
Биікке, асқақ шыңға қайта-қайта ұмтылуға?
Не кедергі бақытты болуыңа?

Оян, жастар, аш көзіңді, тұр ұйқыдан
Алға тартын, талпынып, болма жалған
Өрмеле биігірек бар әлемнен
Сен болмасаң, мұны ешкім жасай алман...