Өлең, жыр, ақындар

Төзімдер туралы

  • 21.03.2019
  • 0
  • 0
  • 3230
Сыйламай болмайды
Әйелдің сезімін,
Мақтамай оңбаймыз
Әйелдің төзімін.
Еркектер білгірміз,
Сөйлеуге ұстамыз,
Ақылға ұзынбыз,
Төзімге қысқамыз.
Ал әйел бастың да –
Қанның да ыстығын –
Бұғаулап ұстайды
Сабырымен күштінің.
Көздердің не түрлі
Сиқырын қайтарып,
Сөздердің не түрлі
Қиқымын тойтарып.
Тежейді құлқынын
Құмарлық дегеннің.
Кетпейді ырқымен
Жеңілтек өлеңнің.
***
Достар!
Мен бұлбұл да емеспін,
Дүлдүл де емеспін,
Аспанмен тілдескен
Алатау да емеспін.
Біреуімін кәдімгі көп дөңестің.
Алдында жүремін
Әдемі елестің,
Ішінде боламын
Жұрт қостар кеңестің,
Сыртында боламын
ЬІрылдасқан егестің.
***
Келмейтін қайта оралып
Көрінген түстей балалық,
Көңілде қапты-ау сәулесі,
Қызуы тарап жоғалып.
Балалық сәулем, сөнбеші,
Суық жел соқса көнбеші.
Қараңғы тартып кетпесін,
Ақынның кәрі кеудесін.
***
Күллі әлемнің сан жетпейтін күндері,
Құшағыма сия қалса бір менің,
Бәрін соның құшақтауға көнер ем,
Бар жылуын достарыма берер ем.
Өйткені біз тудық емес пе арналып,
Жасау үшін жарастықтың заңдарын?
***
Достар келді, достар бүгін жиналды,
Достарға біз әзірледік сыйларды.
Мен жырыммен ой тынысын қайтарып
Ақ шашыммен ақ тілеулер айтамын:
– Өміріміздің көркін ызғар шалмасын,
Көңілімізде күй қанаты талмасын.
Ленин туы еңкеймесін биіктен,
Бір де сәби жыламасын күйіктен.
Адам көркін ешкім қорлай алмасын,
Адам еркін ешкім зорлай алмасын.
Ән-күйіміз аспанды да шарласын,
Жатсын жермен қанаттары жалғасып.
Ұлы Отанның топырағы жанбасын,
Өссін күлкі, өссін гүлдер қауласын.
Достарымның бастан бағы таймасын,
Жүздерінен шаттық шұғыла аумасын.
***
Ойым менің тыпыршиды тыншымай,
Аңғарады әлем сырын тыңшыдай.
Мен жылдарды өткем сонау санаймын,
Мен жолдарға қалған сонау қараймын.
Ауыр еді-ау жеңістердің жолдары,
Болдырған жоқ бірақ адам қолдары.
Сол қолдарда құдіреті бар алыптың,
Сақтап қалған шұғылаларын жарықтық,
Сұмдық еді-ау соғыс...
Сонда да өмірді
Демедік біз қансырады, жеңілді.
Өрт - апаттан қорғап оны қалдық біз,
Сұлулыққа жалғастырып алдық біз.
Өткенді мен еске алмаймын мұңданып,
Өткен жолдың оттары әлі тұр жанып.
Мен бүгінгі алтын танды сүйемін,
Мен бүгінгі тірлікке бас иемін.



Пікірлер (0)

Пікір қалдырыңыз

Тау қойнында

  • 0
  • 0

Жаз еді мен Алатаумен
Тілдескенде, сырласқанда,
Гүлін иіскеп, көгін басып,
Құзды заңғар шыңға асқанда,

Толық

Көмеміз музыкасыз

  • 0
  • 0

Сөз теріп ұйқас жаман, ырғақ қалап,
Жүрміз ғой ақын деген атты арқалап.
Шығарсақ өлең жинап көңілдіміз,
Жырладық дей саламыз өмірді біз.

Толық

Ол оңай-ақ тауыпты

  • 0
  • 0

Іздедім кеп, іздедім
– Іздеушіміз біз! дедім.
Із кескен ит секілді
Шаршап талай өкіндім...

Толық

Қарап көріңіз

Пікірлер