Тұрмағамбет Ізтілеуұлы

Толымды жігіт

Бұл бетте «Толымды жігіт» атты Тұрмағамбет Ізтілеуұлы жазған өлеңнің мәтіні берілген. Өлең тексті, өлең жолдары және толық нұсқасы осы жерде жарияланған.

18.04.2019
0
0
3472

Қас масаты қағылса,
Күннен-күнге құлпырар.
Шыны жүйрік наз бедеу
Шапқан сайын жұлқылар!
Толымды жігіт тор бұзған
Жолбарыстай бұлқынар!
Қаңтарда қатқан дариядай
Бетінен буы бұрқырар!
Ел ісін дайын етуге
Атқан оқтай зырқырар!
Кім де болса қадірлеп,
Үйірсек аттай шұрқырар!
Жұмысына жаманның,
Сай-сүйегің сырқырар!
Атын атап шақырсаң,
Даусы шықпай қырқырар.
"Мұның не?" деп ойнасаң,
Жас баладай шырқырар.
"Келмесін, - деп, - кісі үйге"
Есігіне құлып ұрар.
Онысын мін ғып мазақтап,
Қатары қорлап жұлқылар.
Сағасыз су қайткенмен,
Сарқырай алмас, тырқырар.

Тұрмағамбет Ізтілеуұлы жігіт толымды жігіт Тұрмағамбет Ізтілеуұлы өлеңдері

Пікірлер (0)

Пікір қалдырыңыз

Жиі қойылатын сұрақтар