Төрежанов Көбжан өлгенде әйеліне жазып берген жоқтау жыр

Құлақ қойып тыңдаңдар,
Көңіл айта келген ағайын.
Тозып қалған тозаң боп,
Көңілдің шаңын қағайын.
Құдайға шүкір, байқасам,
Қамықпаған халық жоқ,
Қайнаға болып, я қайын.
Ауру жанға батқан соң,
Күні бұрын күтініп,
Шақырып алды маңайын.
Сахан, қабір салдырды,
Санаулы өмір сарқылса,
Деп маған өлім тағайын.
Сол айтқаны шын болып,
Ақыретке аттанды,
Енді іздеп қайдан табайын?
Алдырған көзін сонадай,
Шуылдатып кемді күн,
Деген да Тәңірім: "Қамайын!".
Қамыға бермей, қалайда,
Ақырын тілеп Алладан,
Ой жыртығын жамайын.
Көзіндей көріп марқұмның,
Бір қыз бенен екі ұлды,
Өмірімше бағайын.
Тілектес тегіс болыңдар,
Әруағына сыйынып,
Шамамша шырақ жағайын!
* * *
Марқұмды кешегі өткен жоқталық та,
Шығарып іштен жалын тоқталық та.
Көп сәлем көшерінде айтып еді,
Жар мен дос жақындағы жоқ халыққа.
Риза бол, орынына келген халық,
Барады бауырым күйіп, ішім жанып.
Отырған отын жағып үш балаға,
Жүріңдер азаматтар көзді салып.
Қадірсіз қай жерге де емес еді,
Халықтың мініп өтер кемесі еді,
Сыбанған сырттан білек дұшпандары,
Көргенде пәлен - пәштен демес еді.
Тәңірі үйген төбедей еді тірілікте,
Онда да ойы жоқ еді ірілікте.
Атпенен өте алмайтын Сыр суы да,
Тұрушы еді тобығы мен сірілікте.
Аттанды алты ай жатып, елу жаста,
Біз қалдық, болғаннан соң шыбын басқа.
Келетін, қайткенменен, көрінбейді,
Ойбайлап, ұрғанменен басты тасқа.
Сонда да жылап-сықтап, шағынамын,
Дидарын жақсылардың сағынамын.
Адасқан ақылынан мен бір ғаріп,
Айтыңдар, ақылдарыңды неғыламын?
Қылмаңдар мені айыпты "Жылады", - деп,
Өлгенге қалайынша қылады деп.
Ақырын оңғармаса, ойланамын,
Гүжімім көлеңкелі құлады деп.
Алған соң отбасының Алла құтын,
Сыртым сау болғанменен, ішім түтін.
Тілектес тегіс халқым болғайсыңдар,
Алғай деп ұжмақтан үй, нұрдан — сүтін.
Арман жоқ ақыретте қосса Құдай,
Кім жүреді дүнияда өлмей ұдай?
Сұрайын сабыр етіп енді ақырын,
Баспаған көкірегін кімнің лай?
Қояйын енді Құран оқы, халқым,
Құл болмайды, үкіміне Хақтың көнбесе әркім.
Қол жайып, үлкен-кіші дұға етіңдер,
Болғай деп рақматта осы марқұм.

---