Өлең, жыр, ақындар

Ақылды Тоқылдақ

  • 27.04.2019
  • 0
  • 0
  • 3443
— Көк-ек,
Кө-кек,
Кө-кек!— деп,
Күні бойы секектеп,
Өзін өзі кекеткен
Не күтесің Көкектен!
Ақылы оның ауысқан!—
Деді суайт Сауысқан.
— Ұрлықпенен күнелткен,
Төңірегін түңілткен
Сауысқан да құс боп па,
Талтаңдаған қыстақта?!—
Деді Қарға,— От басын
Күзеткеннен сақтасын!
-- Қар-рқ,
Қар-рқ,
Қар-рқ!— деп,
Біз тамаққа қарық деп,
Қи жейтұғын сасықты,
Қоян жүрек жасықты
Құс дейміз бе?
Масқара!—
Деді ашулы Тазқара.
— Көзін сүзіп аспанға,
Жарымай бір жас қанға,
Тазқараңыз өрекпіп,
Өлексені қорек қып,
Өзін құс деп атамақ,
Болмас!— деді Жапалақ.
— Күндіз қалғып, түн ұшып,
Отыр енді құнысып,
Әй, Жапалақ, Жапалақ,
Ертелі-кеш қаталап,
Қаншама жыл төкті қан,
Ұят!— деді Көкқұтан.
— Батпақ кешкен сорайып
Көкқұтанда зор айып:
Бүкіл көлге бүлік сап,
Бақаларды қырып сап,—
Деді Көкек,— Көкқұтан
Өзі қанша төкті қан!..—.
Таусылғандай іс тіптен,
Міне, осылай құс біткен
Бірін бірі жамандап
Жатқанда...
Ісін тәмәмдап,
Еңбек еткен Тоқылдақ
Бәрінен де ақылды-ақ!



Пікірлер (0)

Пікір қалдырыңыз

Төбет пен күшік

  • 0
  • 0

Иығыңды жауып жылы ішікпен,
Даналықтың бальзамынан ішіп пе ең?!
Ішсең егер — түсінесің,
Қарашы,

Толық

Алпыс

  • 0
  • 0

Амалсыздан көнеді адам болмысқа.
Алты қырдан асқаннан соң —
Жол қысқа.
Ал сен болсаң жиырмадасың,

Толық

Қызғаншақ келіншек

  • 0
  • 0

Азаматын кінәлідей тергеген
Әйелді мен бұрын-соңды көрмегем.
Жүрекпенен ұстамасаң жігітті,
Жүгендеуің мүмкін емес мөрменен!

Толық

Қарап көріңіз