Темір

Жиырмасыншы ғасырдың төрінде өсіп,
Жұқартамыз жүйкені керілдесіп.
Темір табыт бұйырып кейбіреуге,
Тербетеді сәбиді темір бесік.
Темір-бетон үйдің де қабырғасы.
Ғалымдардың темірден ауыр басы.
Темір түйме,
Темір жіп,
Темір тарақ,
Темір табақ,
Темір тіс,
Темір қасық.
Темір көсеу заводта көмір көсеп,
Темір жырын тыңдасаң — өмірге есеп.
Темір тұлпар жеткізіп жер түбіне,
Түнде сені күтеді темір төсек.
Темірғали, Темірбек — не бір есім
Танытады қазақтың Мэгресін.
Парктердің қоршауы — темір қоршау,
Банктердің есігі — темір есік.
Темір жолдар жатқанда тамырланып,
Аңқау болып бекерге аңырмалық.
Су астында жүйткиді темір қайық,
Темір қайық, яки темір балық.
Қуанышты көргенде негр бізді,
Құшағында достықтың өмір қызды.
Бомба деген бар темір жұмыртқалар,
Темір қырғи,
Бар және темір құзғын.
Темір,
Темір...
Біз кеше өлең-жыр ек.
Бәрін еске аламын мен елжіреп.
Керек бізге темір күш,
Темір төзім.
Керек емес жалғыз-ақ темір жүрек!