Сырымның қазасын естірту

Сырым Хиуада жүріп қайтыс болады, бала-шағасына естіртуге елдің адамы жиналып ешбір қисынын таба алмай жүреді. Елдің шетінен Ұрышта деген биді алдырады. «Сырымның өлімін қатын-баласына естірту керек болып сізді алдырдық, соған баралық, барып естіртелік, сіз соны айтыңыз», — дейді халық. Барады, бір-екі күн қонақ болғасын, қызмет айтылады.

— Шырағым, Қазыжан,
Қарт атаң сенің Дат еді-ау,
Есіміне ісі лайық емес,
Тек бір қойған ат еді-ау!
Өзіңнің атың Қазы еді-ау,
Қысың да сенің жаз еді-ау!
Әкең сенің Сырым-ды,
Кебеже қарын, кең құрсақ,
Іші толған білім-ді.
Тек қазақ жұрты емес,
Билегендей ер еді-ау
Қытай менен Қырымды.
Әкең Сырым аман келсе,
Сүйіншіге берер ме едің,
Олжатай мен Сүгірді?
Сол секілді Сырекемнің
Арғымақ аты сүрінді, —

дейді Ұрышта қарт. Бұны естіп Қазы би қонақтарын таратпай, алғашқы садақасын беріп қайырған дейді.

Оқуға кеңес береміз:

Жылқының торысы көп пе, төбелі көп пе? (І нұсқа)

Сырымның Нұралы ханды шабуы (ІІ нұсқа)

Баймағамбет сұлтан мен Сырым батыр