Дастан Сатбаев – «Қайраттан» «Челсиге» дейінгі жол

   Дастан Сатбаев – Қазақстан футболының үміт жұлдызы
    2008 жылдың 12 тамызында Алматы қаласында дүниеге келген Дастан шабуылшы позициясында ойнайды. Ол 8 жасынан бастап «Қайрат» футбол академиясында жаттығып, футболдағы шеберлігін көрсете бастады.

     2024 жылдың 26 мамырында Дастан «Қайрат» командасының негізгі құрамында ресми матчқа шыққан ең жас ойыншы болды. 15 жас 9 ай 14 күнде ол Абзал Бейсебековтің рекордын жаңартты.

    Дастан «Қайрат» U18 құрамында QJ League турнирінде ерекше нәтиже көрсетті: 12 ойында 19 гол соғып, 7 нәтижелі пас жасады. Бұл оның өзінен үлкен ойыншылармен де сәтті ойнай алатынын дәлелдеді. Бұған қоса, сәуір айында ол «Қайрат-Жастар» құрамында дебют жасап, алғашқы голын соқты. Оның жетістіктері халықаралық спорт агенттерінің назарын аударып, Дастан Еуропаның беделді клубтарының назарына түсті. Австрияның «Зальцбург», Германияның «Байер», Португалияның «Бенфика», Испанияның «Реал Сосьедад» және Англияның әйгілі «Челси» клубтары жас ойыншыны өз қатарына қосуға ниет білдірді.

    Дастан Лондонның «Челси» клубын таңдады. Келіссөздер нәтижесінде ағылшын клубы жас ойыншы үшін 4,3 миллион еуро төлеуге дайын екенін мәлімдеді. Алайда FIFA ережелеріне сәйкес, Дастан «Челсиге» тек 18 жасқа толғаннан кейін ғана қосыла алады. Осы уақытқа дейін Дастан «Қайрат» клубының намысын қорғауды жалғастырады.

«Journiverse» білім беру орталығының оқушысы: Димаш Маратұлы