Ана тілі ұлт болмысының тірегі

Ана тілі – ұлт болмысының тірегі Ана тілі – әр ұлттың рухани жаны, тарихы мен мәдениетінің айнасы. Тіл – ұлтты ұлт ететін, оны өзгеден ерекшелейтін басты құндылық. «Өзге тілдің бәрін біл, өз тіліңді құрметте» деген қанатты сөздің астарында терең мағына жатыр. Ана тіліне деген құрмет – туған жерге, ата-бабаға, ұлтқа деген шынайы сүйіспеншіліктің белгісі. Қазақ халқы – терең тарихы мен бай мәдениеті бар халық. Сол мәдениеттің жүрегі – қазақ тілі. Тіл арқылы ұрпаққа салт-дәстүр, әдет-ғұрып, даналық сөздер мен ұлттық тәрбиенің негізі жеткізілген. Асан қайғы мен Бұқар жыраудан бастап, Абай мен Мұқағалиларға дейінгі сөз зергерлерінің мұрасы да – тілмен өрілген баға жетпес байлық. Сондықтан да ана тіліне немқұрайлы қарау – сол байлықты, сол тамырды қиғанмен тең. Қазіргі таңда қазақ тілінің мәртебесін көтеру – маңызды міндеттердің бірі. Қуантарлығы – соңғы жылдары мемлекеттік тілді дамыту бағытында түрлі шаралар қабылданып жатыр. Алайда, тіл тек саясатпен немесе заңмен ғана дамымайды. Тілді шынайы өмірде қолдану, оны күнделікті қарым-қатынаста сақтау – әр азаматтың парызы. Ана тіліміздің қадірін арттыру – тек мектептегі пән емес, бұл – отбасынан басталатын тәрбие, жүректен шығатын ықылас. Жастардың арасында шұбарланған тілмен сөйлеу жиілеп барады. Бұл – алаңдататын құбылыс. Ана тілін білу – тек міндет емес, бұл – ұлттық болмысқа, өз тамырыңа деген адалдық. Кез келген өркениетті ел ана тілін ардақ тұтады. Сондықтан қазақ жастары да өз тілін мақтан тұтып, оны жаңа биіктерге көтеруі керек. Қазақ тілі – мәңгілік елдің мәңгілік тілі болуға лайық. Тек біз – ұлт болашағы, осы тілдің бойтұмарындай сезініп, оны жүрегімізде мәңгі сақтасақ болғаны. Ана тілі – біздің болмысымыздың тірегі, өткеніміздің ізі, болашағымыздың шамшырағы. 11 «А» сынып оқушысы Есенбай Дидар Абуталипқызы

---