Жастар және волонтерлік

     Қазіргі заманда жастардың белсенді өмірлік ұстанымдарының бірі — еріктілік. Қазақстанда ерікті қозғалысы жылдан жылға қарқын алып келеді. 2024 жылғы ресми дерекке сүйенсек, елімізде 275 мыңнан астам белсенді ерікті тіркелген. Олар экология, әлеуметтік көмек, медицина, білім беру сияқты салаларда қызмет атқаруда. Еріктілік қоғам үшін де, жеке тұлға үшін де және ел болашағы үшін де пайдалы екені айқын.

Қазақстандағы еріктіліктің даму жолы

Еріктіліктің елімізде бүгінгі деңгейге жетуі бір күннің ісі емес. Мемлекеттік құжаттар мен ресми платформалар деректеріне сүйенсек:

• 2009 жылы «Жастар саясаты туралы» заңда алғаш рет «еріктілік қызмет» ұғымы енгізілді.
• 2016 жылы арнайы «Волонтерлік қызмет туралы» заң қабылданып, бұл сала құқықтық негізге ие болды.
• 2019 жылы QazVolunteer.kz ұлттық платформасы іске қосылып, сол жылы Қазақстанда «Волонтер жылы» жарияланды.
• 2021–2023 жылдары еріктілікті дамыту жөніндегі Жол картасы жүзеге асырылып, өңірлерде фронт-кеңселер ашылды.

Осы кезеңдер арқылы еріктілік мемлекет деңгейінде қолдау тауып, жастардың өмір салтына айналып келеді.

Қоғамға пайдасы

Еріктілердің еңбегі қоғам үшін өлшеусіз. Мысалы, 2024 жылы Астанада «Таза Қазақстан. Астана — тазалық пен тәртіптің үлгісі» атты экологиялық акция өтті. «Астана жастары» ресурстық орталығының 20-дан астам еріктісі Есіл өзенінің жағасын тазалап, бірнеше сағат ішінде 20 қаптан астам қоқыс жинады.

Тағы бір мысал — «Жасыл ел» қозғалысы. 2024 жылы Семей қаласында бағдарламаның 20-шы маусымы басталды. Бағдарламаға 16 мен 35 жас аралығындағы жастар қатысып, жазғы маусымда кемінде 70 адам жұмыспен қамтылуға жоспарланды. Ұйым қала аумағын көгалдандыру, тазалық жұмыстарымен айналысып, жастардың экологиялық санасын арттыруға үлес қосып келеді.

Жеке тұлғаға пайдасы

Еріктілік — тек қоғамға қызмет қана емес, тұлғаның өзін дамыту жолы. Ақмола облысынан шыққан әлеуметтік ерікті-тәлімгер Милана Сайлаубаева өз тәжірибесімен бөлісіп:

«Жүрек пен ниет болса — жеткілікті. Әр адам бір өзгерістің бастауы бола алады», — дейді. Ол студент кезінде экологиялық акцияларға және балалар үйіндегі шараларға қатысып, осы жолды таңдаған. Қазір студенттермен жұмыс істеп, жас ұрпаққа үлгі болып жүр. Бұл мысал еріктіліктің адамның сенімділігін арттырып, жанашырлық пен өмірлік тәжірибе сыйлайтынын көрсетеді.

Болашақ үшін пайдасы

Мемлекет еріктілікке ерекше көңіл бөлуде. 2024–2026 жылдарға арналған жаңа Жол картасы қабылданды. Бүгінде елімізде 755 еріктілік ұйым мен шамамен 2 мың бастамашыл топ жұмыс істейді. Қазақстандық еріктілер халықаралық деңгейде де белсенді: 2024 жылы жастар Түркия мен Кениядағы жобаларға қатысып, тәжірибе алмасты. Бұл — Қазақстанның әлемдік азаматтық қоғамға қосқан үлесінің бір дәлелі.

    Еріктілік — қоғамға көмек қана емес, әрбір жастың тұлғалық дамуының құралы. Қазақстандағы еріктілік қозғалысының тарихы мен бүгінгі жетістіктері бұл саланың болашағы зор екенін дәлелдейді. Әр адам жүрек пен ниет арқылы үлкен өзгерістің бастаушысы бола алады.

«Journiverse» білім беру орталығының оқушысы: Талғат Ясмин