Республика күні – елдің жаңару мен бірлігінің нышаны

Республика күні – елдің жаңару мен бірлігінің нышаны

Автор: Есқали Айнара, 1 курс студенті

Қазақстан үшін 25 қазан — ел тарихындағы ерекше күндердің бірі. Бұл күн— мемлекетіміздің егемендігін жариялауға жол ашқан тарихи сәттің символы. 1990 жылы дәл осы күні «Қазақстан Республикасының мемлекеттік егемендігі туралы декларация» қабылданып, халқымыздың тәуелсіз ел болуға бағытталған алғашқы қадамы жасалды. Бұл құжат халқымыздың ғасырлар бойғы арманының орындалуына жол ашқан тарихи шешім болды. Егемендік декларациясы елдің рухани жаңғыруының, өз тағдырын өзі айқындауға деген сенімінің бастауы еді.

Бүгінгі таңда Республика күні — жай ғана тарихи мереке емес, ол елдің рухын көтеретін, бірлігін нығайтатын және жаңа буынды отансүйгіштікке баулитын мереке. Бұл күн әрбір азаматқа өз елінің тағдырына бейжай қарамаудың, елдің дамуына үлес қосудың маңызын еске салады. Республика күні — тәуелсіздікті құрметтеудің, елді сүйе білудің және болашаққа сеніммен қараудың белгісі.

Қазіргі қоғамның басты күші — жастар. Республика күні — жастарға өз елін сүйіп, оның болашағына сеніммен қарауға, ел мүддесі үшін еңбектенуге үндейтін ерекше мереке. Тәуелсіз елдің ұрпағы үшін басты құндылық — еркіндік пен білім. Бүгінгі жастар тек өз арманын ғана емес, қоғамның дамуы мен тұрақтылығына да үлес қосуы тиіс. Әр жас азамат туған жердің өркендеуіне, әділ қоғам құруға, мәдениет пен білім саласын дамытуға өз еңбегімен атсалысса, ел болашағы да нұрлы болмақ.

«Республика» сөзі латын тілінен аударғанда «ортақ іс» деген мағынаны білдіреді. Демек, мемлекет — баршаның ортақ үйі, ортақ жауапкершілігі. Республика күні — халықтың бірлігін, елдің егемендігін және өз тағдырына өзі жауап беру құқығын дәріптейтін маңызды мереке. Бұл күн әр қазақстандыққа ортақ мақсат пен елдік мүдденің қадірін сезінуге мүмкіндік береді.

Журналистика да осы құндылықтарды дәріптеуде үлкен рөл атқарады. Ақпарат таратушы ғана емес, қоғамды біріктіруші күш ретінде журналистер ел бірлігі мен азаматтық сана туралы ой қозғап, Республика күнінің маңызын халыққа терең ұғындыруға атсалысуы қажет. Себебі медиа — тек жаңалық жеткізуші емес, қоғамның айнасы.

Қорытындылай келе, Республика күні — өткенге тағзым, бүгінге алғыс, ертеңге сенім білдірудің мерекесі.
Бұл мереке бізге тәуелсіздік пен еркіндіктің оңай келмегенін еске салып, болашаққа жауапкершілікпен қарауға үндейді. Республика рухы — елдің жүрегінде, ал елдің күші — бірлікте.

Әлеуметтік желілерде бөлісіңіз: