Жұмыссыздық: қоғамдық мәселе және шешу жолдары

    Қазақстанда жұмыссыздық — өзекті әлеуметтік-экономикалық мәселе. Бұл құбылыс қоғамның тұрақты дамуына әсер етіп қана қоймай, халықтың тұрмыс деңгейін төмендетеді. 2025 жыл бойынша елімізде жұмыссыздық деңгейі 4,6% деп көрсетілген.

Жұмыссыздықтың негізгі себептерінің бірі — еңбек нарығы мен білім беру жүйесінің арасындағы сәйкессіздік. Көптеген жастар жоғары оқу орнын бітіргенімен, алған мамандықтары нарық сұранысына толық сәйкес келе бермейді. Сонымен бірге кейбір аймақтарда өндірістік кәсіпорындардың аздығы, ауылдық жерлердегі экономикалық мүмкіндіктердің шектеулі болуы да жұмыссыздық деңгейін арттырады.

Жұмыссыздық — тек экономикалық емес, әлеуметтік мәселе. Тұрақты жұмыстың болмауы адамның өмір сапасын төмендетіп, сенімсіздік, күйзеліс және әлеуметтік теңсіздік тудыруы мүмкін.

Бұл мәселені шешу үшін мемлекет тарапынан түрлі бастамалар жүзеге асырылуда. Мысалы:

• «Жастар практикасы» — жастарды жұмысқа бейімдеу;

• «Бастау Бизнес» — кәсіпкерлікке оқытып, бизнес ашуға мүмкіндік беру;

• «Еңбек» бағдарламасы — халықты жұмыспен қамтуға бағытталған кешенді жоба.

Бұл жобалар жұмыссыздықты азайтып, жастар мен ересектердің еңбек нарығына бейімделуіне жағдай жасап келеді.

«Journiverse» білім беру орталығының оқушысы: Нұрдаулет Фариза