Семіздік — XXI ғасырдың жаһандық мәселесі

    Соңғы жылдары семіздік әлемдік деңгейдегі өзекті медициналық және әлеуметтік мәселелердің біріне айналды. Дүниежүзілік зерттеулерге сәйкес, қазіргі таңда ересек адамдардың шамамен 39–40 пайызы артық салмаққа, ал 15–16 пайызы семіздікке шалдыққан. Бұл көрсеткіштер денсаулық сақтау саласына айтарлықтай салмақ түсіріп отыр. Мәселе тек ересектермен шектелмейді. Жасөспірімдер арасында артық салмақ пен семіздікке шалдыққандардың үлесі 20 пайызға жуық. Бұл жағдай болашақта созылмалы аурулардың ерте жастан қалыптасуына алып келуі мүмкін.

Қозғалыстың аздығы — басты қауіп факторы

Зерттеулерге сәйкес, адамдардың көпшілігі күніне 7–9 сағатқа дейін қозғалыссыз отырады. Мұндай отырықшы өмір салты семіздікке ұшырау қаупін 30–40 пайызға арттырады. Қозғалыстың жеткіліксіздігі ағзаның зат алмасуын баяулатып, артық майдың жиналуына себеп болады.

Денсаулыққа төнетін қауіп

Артық салмақтың адам денсаулығына тигізетін зияны айтарлықтай. Мамандардың дерегіне сүйенсек, артық салмағы бар адамдарда жүрек-қан тамыр аурулары мен қант диабетінің пайда болу қаупі екі есе жоғары. Бұл аурулар өмір сапасын төмендетіп қана қоймай, ерте өлім-жітім көрсеткішінің артуына да әсер етеді.

Семіздіктің негізгі себептері

Мамандар семіздіктің басты себептері ретінде:

• отырықшы өмір салтын,

• дұрыс тамақтанбауды,

• физикалық белсенділіктің төмендігін атайды.

Қазіргі қоғамда жылдам дайындалатын тағамдардың кең таралуы мен қозғалыстың азаюы бұл мәселені одан әрі ушықтырып отыр.

«Journiverse» білім беру орталығының оқушысы — Божбанбай Рабия