Жастардың қазақ тілін насихаттаудағы маңызды рөлі

   Қазақ тілі – ұлттың рухани байлығы мен мәдени болмысының негізі. Тілдің дамуы мен күнделікті қолданыста болуы тек мемлекеттік деңгейдегі саясатқа ғана емес, ең алдымен қоғамның, соның ішінде жастардың белсенділігіне тікелей байланысты. Қазіргі кезеңде қазақ тілінің мәртебесін көтеруде жас буынның рөлі айрықша маңызға ие.

Қазақ тілін меңгеру деңгейі

Қазақстанда қазақ тілінің қолданыс аясы жыл сайын кеңейіп келеді. 2021 жылғы ұлттық халық санағының деректеріне сәйкес, халықтың 80,1 пайызы қазақ тілін белгілі бір деңгейде меңгерген. Бұл көрсеткіш азаматтардың қазақ тілінде сөйлей, түсіне немесе оқи алатынын білдіреді. Сонымен қатар білім беру саласында да оң өзгерістер байқалады. Зерттеулерге сәйкес, балалар мен жастардың 66,2 пайызы жалпы білім беру мектептерінде қазақ тілінде білім алады. Бұл — мемлекеттік тілге деген сұраныстың артып келе жатқанын және жастардың қазақ тіліне қызығушылығының жоғары екенін көрсететін маңызды көрсеткіш.

Жастар және тілдік насихат

Қазақ тілін насихаттауда жастардың тек күнделікті қолданысы ғана емес, мәдени және шығармашылық ықпалы да маңызды. Осы тұрғыда қазақ тілін әлемдік деңгейде танытып жүрген тұлғалардың бірі — Димаш Құдайберген. Оның шығармашылығы арқылы қазақ тілі халықаралық аудиторияға жетіп, шетелдік тыңдармандардың да қызығушылығын тудыруда. Димаш Құдайбергеннің әндері көркемдік мазмұнымен қатар, қазақ тілінің бай сөздік қорын, әуезділігі мен көркемдігін көрсетеді. Әрбір өнер көрсетуі тек эмоциялық әсер қалдырып қана қоймай, көрермендердің тілге деген қызығушылығын арттыруға ықпал етеді. Бұл жастар үшін қазақ тілін заманға сай насихаттаудың тиімді үлгісі ретінде бағаланады.

Тілдің болашағы — жастар қолында

Қазақстандағы тілдік ортаның қалыптасуы жастардың белсенді қатысуымен нығая түсуде. Халықтың 80 пайыздан астамының қазақ тілін меңгеруі, сондай-ақ жастардың басым бөлігінің қазақ тілінде білім алуы — мемлекеттік тілдің болашағын айқындайтын негізгі факторлардың бірі. Қазақ тілінің дамуы мен кеңінен қолданылуы — үздіксіз үдеріс. Бұл жолда жастардың рөлі ерекше. Олар білім беру, мәдениет, өнер және әлеуметтік кеңістік арқылы қазақ тілінің беделін арттырып, оның болашақ ұрпаққа берік негізде жетуіне үлес қосады. Сондықтан қазақ тілін насихаттау — тек міндет емес, ұлт болашағына салынған инвестиция.

«Journiverse» білім беру орталығының оқушысы: Хамит Фариза