“Nrane Par” би ансамблі

    «Nrane Par» би ансамблі 2022 жылғы 18 қазанда Өскемен қаласында құрылған. Ансамбльді Балеян Сюзанна мен Меновщикова Ольга негіздеді. Ұжымның басты мақсаты – ұлттық және этникалық билерді насихаттау, жас ұрпақтың мәдени тәрбиесін дамыту, сондай-ақ халықтық би өнерін заманауи сахна талаптарына сай жетілдіру.

Ансамбль атауы армян тілінен алынған: «Par» – би дегенді білдірсе, «Nrane» анар символымен байланысты. Армян мәдениетінде анар бірлік, өмір, береке және рухани сабақтастықтың белгісі ретінде бағаланады. Бұл атау ансамбльдің шығармашылық бағыты мен идеялық концепциясын айқындайды.

«Nrane Par» студиясында армян және грузин халық билері кәсіби деңгейде үйретіледі. Қазіргі таңда ансамбль құрамында 5 топ жұмыс істейді. Негізгі топқа 16 жастан бастап қатысушылар қабылданады, ал жас ерекшеліктеріне қарай құрылған кішкентай топтар да тұрақты дайындықтан өтеді.

Ансамбльдің шығармашылық жетістіктері де айрықша. 2025 жылы негізгі топ Алматы қаласында өткен республикалық байқауда Гран-при жүлдесін жеңіп алды. Бұл ұжымның кәсіби шеберлігін, жүйелі еңбегін және сахналық мәдениетінің жоғары деңгейін көрсетеді. Сонымен қатар, кішкентай топ қалалық және аймақтық байқауларда бірнеше рет I және II орындарды иеленіп, ансамбль беделін арттырды. Ансамбльдің негізгі тобының хореографы – Меновщикова Ольга, ал кішкентай топтың хореографы – Дильназ Берікболқызы. Олардың кәсіби тәжірибесі мен шығармашылық әдіс-тәсілдері ансамбльдің тұрақты дамуына және жоғары нәтижелерге жетуіне ықпал етеді. Қазіргі таңда «Nrane Par» би студиясы Арменияның Ереван қаласында да ашылған.

«Nrane Par» би ансамблі – ұлттық мәдени мұраны сақтау мен дамытуды мақсат еткен, жоғары шығармашылық әлеуетке ие, заманауи талаптарға сай жұмыс істейтін кәсіби өнер ұжымы болып табылады.

«Journiverse» білім беру орталығының оқушысы: Сайранбек Мөлдір​