ҰБТ: білім сапасының өлшемі және болашаққа бастар қадам

     Қазақстандағы білім беру жүйесіндегі маңызды кезеңдердің бірі – Ұлттық бірыңғай тестілеу (ҰБТ). Бұл сынақ мектепті аяқтаған түлектердің білім деңгейін бағалап қана қоймай, олардың жоғары оқу орындарына түсу мүмкіндіктерін айқындайтын басты тетік болып саналады. 2004 жылдан бастап енгізілген ҰБТ бүгінде еліміздің білім беру саласындағы негізгі реформалардың бірі ретінде қарастырылады.

Қазақстан бойынша 181 000-нан астам талапкер ҰБТ тапсырды (екі мүмкіндікті есепке алғанда тест тапсыру саны – 326 000 рет). Яғни көптеген талапкерлер жоғары оқу орнына түсу мүмкіндігін арттыру үшін тестілеуден екі рет өткен.

• Қатысушылардың 75,1%-ы қазақ тілінде, 24,8%-ы орыс тілінде, ал 168 адам ағылшын тілінде тест тапсырды;

• Шекті балл жинаған талапкерлердің үлесі 76,4%-ды құрады (шамамен 139 000 адам).

ҰБТ жүйесінің негізгі мақсаты – білім сапасын әділ әрі бірізді бағалау. Тест форматы оқушының тек жаттаған білімін ғана емес, сонымен қатар логикалық ойлауын, талдау және салыстыру қабілетін де анықтауға мүмкіндік береді. Түлектер таңдау пәндеріне сәйкес болашақ мамандығына алғашқы қадам жасайды. Бұл – жас ұрпақтың кәсіби бағыт-бағдарын айқындайтын маңызды механизм.

Дегенмен, ҰБТ жүйесіне қатысты пікірлер әртүрлі. Бірі оны білімнің объективті көрсеткіші деп санаса, енді бірі тест форматы оқушының шығармашылық қабілетін толық аша алмайды деп есептейді. Соған қарамастан, жүйе жыл сайын жетілдіріліп, оның форматы мен мазмұны заман талабына сай жаңартылып келеді. Бүгінгі таңда ҰБТ нәтижесі грант иелену мен оқу орнын таңдауда шешуші рөл атқарады. Сондықтан бұл кезең оқушылар үшін жай ғана сынақ емес, болашаққа жасалатын маңызды қадам. ҰБТ-ға дайындалу жауапкершілік пен тәртіпті талап етеді. Уақытты дұрыс жоспарлау, нақты мақсат қою және жүйелі дайындық арқылы табысқа жетуге болады.

“Journiverse” білім беру орталығының оқушысы: Омирбаева Гулжан