Техникалық білім мен мәдениет үндестігі

Алматы технологиялық университеті – Қазақстандағы жетекші техникалық жоғары оқу орны ғана емес, сонымен бірге жастардың азаматтық жауапкершілігін арттыруға, ұлттық мәдениетке құрметпен қарауға және патриоттық сезімін қалыптастыруға бағытталған тәрбие орталығы. Университет тағам өңдеу және жеңіл өнеркәсіп, экономика және бизнес, туризм саласы, қонақжайлылық индустриясына және IT‑технологияларына мамандар даярлап қана қоймай, олардың бойында елге деген сүйіспеншілікті, рухани байлықты және мәдениеттілікті дамытуды басты міндет санайды.

Патриоттық тәрбие АТУ‑да жүйелі түрде жүзеге асады. Студенттер ғылыми конференциялар мен әлеуметтік жобаларға қатысып, қоғамға пайдалы бастамаларды іске асырады. Волонтерлік қозғалыстар арқылы олар әлеуметтік жауапкершілікті сезінеді, ал шығармашылық клубтар мен мәдени іс‑шаралар олардың ұлттық рухын күшейтеді. Ақпан айында «Мемлекеттік және шет тілдері» кафедрасы ұйымдастырған «Поэзия менің жүрегімде» атты кеш осының жарқын мысалы болды: жастардың жүрек түкпірінен шыққан өлеңдері, классикалық және заманауи шығармалардан үзінділері студенттердің ұлттық мәдениетке деген құрметін арттырып, олардың бойында отансүйгіштік сезімді нығайтты.

АТУ‑дың студенттері патриоттық жобаларға белсенді қатысады: экологиялық акциялар, тарихи мұраларды сақтау бастамалары, ұлттық мерекелерді дәріптеу және әлеуметтік қолдау шаралары олардың азаматтық белсенділігін арттырады. Университеттің мәдени бастамалары – театр қойылымдары, әдеби кештер, ұлттық өнерді насихаттайтын көрмелер – жастардың рухани дүниесін байытып, олардың ел болашағына адал қызмет етуге дайын тұлға болып қалыптасуына ықпал етеді.

Осылайша, Алматы технологиялық университеті кәсіби білім мен рухани тәрбиені ұштастыра отырып, жаңа буын мамандарын тәрбиелеуде. Олар тек өз саласында білікті ғана емес, сонымен бірге мәдениетті, отансүйгіш, қоғамға пайдалы азаматтар болып қалыптасады.

Мақала авторы: «Мемлекеттік және шет тілдері» кафедрасының сеньор-лекторы Жакипова М.Н.