Волонтерлік-қоғамға қызмет етудің жарқын үлгісі

Волонтер – елге өз қалауымен, ешқандай пайда күтпестен, шын ниетімен қызмет ететін адам. Әсіресе бұл тақырып қазіргі жастар арасында өзекті болып отыр. Жалындаған жастардың осындай игі іске араласуы – нағыз патриоттықтың белгісі деп есептеймін. Елімізде волонтерлік қызмет қарқынды дамып келеді. Соның нәтижесінде жастардың бұл бағытқа деген қызығушылығы артып, волонтерлер саны күн санап көбейіп жатыр. Қазақстанда волонтерлік қозғалысты дамытуға ерекше көңіл бөлініп, 2020 жыл «Волонтер жылы» болып жарияланған еді.

Волонтерлік – тек көмек көрсету ғана емес, ол адамгершілік пен жауапкершіліктің мектебі. Волонтерлер түрлі қоғамдық іс-шараларға қатысып, қарттар мен мүмкіндігі шектеулі жандарға қолдау көрсетеді, қайырымдылық акцияларын ұйымдастырады, экологиялық жобаларға атсалысады. Олардың әрбір игі ісі қоғамның дамуына оң әсерін тигізеді.

Қазіргі таңда көптеген жастар бос уақытын тиімді пайдаланып, қоғамдық жұмыстарға белсенді араласуда. Мұндай қызмет олардың бойында мейірімділік, жанашырлық, еңбекқорлық және көшбасшылық қасиеттерді қалыптастырады. Сонымен қатар волонтерлік жастарға жаңа орта тауып, тәжірибе жинақтауға және өз қабілеттерін дамытуға мүмкіндік береді.

Волонтерлер табиғи апаттар кезінде де халыққа көмек қолын созып, қиын жағдайда қалған адамдарға демеу болады. Осындай жанкешті еңбектің арқасында қоғамда өзара көмек пен ынтымақтастық нығая түседі. Сондықтан волонтерлердің еңбегін жоғары бағалау – әрбір азаматтың міндеті.

Менің ойымша, волонтерлік – болашаққа жасалған маңызды қадам. Себебі өзгеге көмектесу арқылы адам өз рухани дүниесін байытады, өмірге деген көзқарасын кеңейтеді. Қоғамның дамуы әрбір азаматтың белсенділігіне байланысты. Сондықтан жастардың волонтерлік қозғалысқа көбірек қатысуы елдің жарқын болашағын қалыптастыруға өз үлесін қосады.

Қорытындылай келе, волонтерлік – мейірімділік пен жанашырлыққа негізделген игі іс. Өзгенің қуанышына ортақтасып, қиын сәтінде қолдау көрсету – адам бойындағы ең асыл қасиеттердің бірі. Ендеше, қоғамның дамуына үлес қосып, айналамызға жақсылық сыйлау әрқайсымыздың қолымыздан келеді.