Еріктілердің қоғамдағы орны

      Еріктілер – өз еркімен қоғамға қызмет етіп, мұқтаж жандарға көмек көрсететін азаматтар. Олардың қызметі қайырымдылықты дамытуға және әлеуметтік мәселелерді шешуге маңызды үлес қосады.

Бүгінде Қазақстанда 300 мыңнан астам ерікті бар. Олар білім беру, экология, денсаулық сақтау және әлеуметтік қолдау бағыттарында жұмыс істейді. Сонымен қатар елімізде волонтерлердің қызметін үйлестіретін 800-ден астам ұйым жұмыс істейді.

Еріктілердің еңбегі әсіресе төтенше жағдайлар кезінде айқын көрінеді. Су тасқыны мен табиғи апаттар кезінде 40 мыңнан астам ерікті зардап шеккен тұрғындарға гуманитарлық көмек көрсетіп, қалпына келтіру жұмыстарына атсалысты.

Еріктілік – тек көмек көрсету ғана емес, қоғамдағы жауапкершілік пен жанашырлықтың көрінісі. Сондықтан волонтерлердің қызметі қоғамның бірлігі мен тұрақты дамуына ықпал ететін маңызды күш болып саналады.

«Journiverse» білім беру орталығының оқушысы: Қадыралина Забира