Бір көргеннен ғашық ететін қала – Астана

Бір көргеннен ғашық ететін қала – Астана

Қаланы алғаш көрген сәтте-ақ оның ерекше рухы мен қайталанбас келбетін сезінесің. Көкпен таласқан зәулім ғимараттар, заманауи сәулет өнері, кең даңғылдар мен түнгі шамдардың жарқылы Астананы жай ғана елорда емес, шабыт сыйлайтын ерекше мекенге айналдырады. Бұл шаһарға бір рет келген жан оның айрықша ажарына, қарқынды тынысына және болашаққа ұмтылған рухына еріксіз тәнті болады. Сондықтан да Астананы «бір көргеннен ғашық ететін қала» деп атау – артық айтылған сөз емес.

«Астана» атауы Қазақстан Республикасы Президентінің Жарлығымен 1998 жылы 6 мамырда ресми түрде бекітілді. Ал оған дейін, 1997 жылы Ақмола қаласы Қазақстан Республикасының астанасы болып жарияланған еді. Содан бері елорда тәуелсіз Қазақстанның өркендеуі мен жаңғыруының айқын символына айналды.

Елорданың басты нышандарының бірі – «Бәйтерек» монументі. Ол 2002 жылы 30 тамызда пайдалануға берілді. Биіктігі 105 метр болатын бұл сәулет туындысы өмір ағашын, бейбітшілік пен жаңа тарихтың бастауын бейнелейді. Бүгінде «Бәйтерек» – еліміздің ғана емес, бүкіл елорданың ең танымал символдарының бірі.

Астана – сәулет өнерінің ерекше үлгісі. Мұнда жыл сайын жаңа тұрғын үйлер, мәдениет және білім беру нысандары, заманауи ғимараттар бой көтеріп, шаһардың көркін одан әрі айшықтай түсуде. Қаланың қарқынды дамуы еліміздің өсіп-өркендеуінің жарқын көрінісі деуге болады.

Көше атауларына назар аударсақ, олардың көпшілігі тарихи тұлғалардың, ақын-жазушылардың, батырлар мен мемлекет қайраткерлерінің есімдерімен аталған. Бұл – өткен тарихымызды ұлықтап, жас ұрпақтың елін танып-білуіне ықпал ететін маңызды рухани құндылық.

Елорда тұрғындарының мәдениеті мен адамгершілік қасиеттері де ерекше әсер қалдырады. Олардың жылы жүзділігі, ізеттілігі, үлкенге құрмет, кішіге қамқорлық көрсетуі – ұлттық тәрбиенің жарқын көрінісі. Мұны қоғамдық көлікте үлкен кісілерге орын беруінен, бір-біріне сыйластықпен қарауынан анық байқауға болады.

Астана – жастардың арманына қанат бітіретін, жаңа мүмкіндіктерге жол ашатын, білім мен ғылымның, мәдениет пен инновацияның тоғысқан ордасы. Бұл – талай жастың арманы орындалып, болашаққа сеніммен қадам басатын қала. Сондықтан Астана тек әкімшілік орталық қана емес, елдің жүрегі, тәуелсіздіктің айғағы және жарқын келешекке бастар даму мекені.

Астана – тәуелсіз Қазақстанның мақтанышы, елдің өркендеуі мен жасампаз рухының айқын көрінісі. Оның сәулетті келбеті, тарихи маңызы, қонақжай халқы мен үздіксіз дамуы әрбір жанның жүрегінен ерекше орын алады. Бұл шаһар өткен мен бүгінді, ұлттық құндылықтар мен заманауи өркениетті үйлестіре білген бірегей қала. Сондықтан Астанаға бір рет келген адам оның ерекше атмосферасына тәнті болып қана қоймай, қайта оралуды армандайды. Расында да, Астана – бір көргеннен ғашық ететін, әрдайым алға ұмтылатын Қазақстанның жүрегі.