ЖИ дәуірі:қорқу керек пе, әлде үйрену керек пе?

ЖИ дәуірі: қорқу керек пе, әлде үйрену керек пе?

Мойындайықшы, біз жасанды интеллект қарқынды дамыған заманда өмір сүріп жатырмыз. Бұл — тек технологияның дамуы емес, сонымен қатар адамның да өзгеріске бейімделу кезеңі. Даму бар жерде мүмкіндік те бар, алайда сонымен қатар өз қолымыздан келетін дүниелерден айырылып қалу қаупі де жоқ емес.

Бүгінде әлеуметтік желілерді ашып қалсақ, үрей туғызатын жаңалықтар күн сайын көбейіп келеді: «ЖИ емтихан тапсырды», «жасанды интеллект кодты адамнан да жылдам жазды» деген секілді ақпараттар жиі кездеседі. Мұндай жаңалықтарды көргенде «Мен артта қалып бара жатқан жоқпын ба?», «Роботтар бәрімізді жұмыссыз қалдыра ма?» деген сұрақтар еріксіз ойға оралады.

Алайда бәріне сабырмен қарап, мәселені тереңірек талдап көрейік.

ЖИ адам жұмысын қаншалықты орындай алады?

Жасанды интеллект нақты алгоритмге құрылған, қайталанатын жұмыстарды өте жақсы атқара алады. Мысалы, бірнеше мәтінді біріктіріп жаңа мәтін құрастыру, қарапайым аударма жасау немесе стандартты код жазу — ЖИ үшін қиын емес. Мұндай жағдайда ол адамнан әлдеқайда жылдам әрі тиімді.

Сондықтан креативі аз, бірсарынды жұмыстарда ЖИ бәсекелеске айналуы мүмкін. Әсіресе жаңа бастап келе жатқан мамандар үшін бұл үлкен сын.

Болашақта қандай мамандықтар сұранысқа ие болады?

Жаңа дәуір жаңа мамандықтарды да қалыптастыруда. Соның бірі — промпт-инженерлер. Бұл мамандар жасанды интеллектке дұрыс әрі нақты тапсырма беруді меңгерген. Қарапайым сұраныс пен кәсіби жазылған промпттың нәтижесі арасында үлкен айырмашылық бар.

Сонымен қатар «адамнан адамға» бағытталған мамандықтар өз құндылығын жоғалтпайды. Психологтар, ұстаздар, коучтар, тәрбиешілер және харизмасы бар блогерлер — бұлардың басты артықшылығы эмоция, жанашырлық және тірі байланыс. Жасанды интеллект қанша дамыса да, адам жүрегін толық түсіне алмайды.

Ең маңызды шындық

Жасанды интеллект сіздің жұмысыңызды тартып алмайды.
Сіздің орныңызды ЖИ-мен тиімді жұмыс істей алатын білікті маман ғана баса алады.

Сондықтан қорқудың орнына үйрену қажет. ЖИ-ді қарсылас емес, құрал ретінде қабылдаған адам ғана алға шығады.

Қорытынды

Жасанды интеллект — қауіп емес, мүмкіндік. Ол жаңа бағыттар мен жаңа есіктерді ашады. Ең бастысы — оны дұрыс пайдалана білу. Бүгіннен бастап дамып, ЖИ-ді өз пайдаңызға жаратуға қадам жасаңыз.