Әйел бастаған көш: заманауи көшбасшылықтың жаңа келбеті

   Қазіргі қоғамда көшбасшылық туралы түсінік өзгеріп, әйелдердің басқару саласындағы рөлі артып келеді. Бүгінде олар отбасы мен қоғам өмірінде ғана емес, бизнес, ғылым, саясат және түрлі ұйымдардың дамуында да маңызды орын алады.

Әйелдердің кәсіпкерлікке араласуы — осы өзгерістің бір көрінісі. Global Entrepreneurship Monitor ұйымының 2023–2024 жылдарға арналған есебіне сәйкес, зерттеуге қатысқан 30 елде әйелдердің жаңа бизнес бастау көрсеткіші 2001–2005 жылдардағы 6,1 пайыздан 2021–2023 жылдары 10,4 пайызға дейін өскен. Бұл әйелдердің кәсіпкерлікке қызығушылығы мен белсенділігінің артқанын көрсетеді. (GEM Global Entrepreneurship Monitor)

Көшбасшылықты тек жыныс ерекшелігімен байланыстыру дұрыс емес. Тиімді басшы болу үшін кәсіби білім, жауапкершілік, стратегиялық ойлау және командамен жұмыс істей білу маңызды. Бұл қасиеттер әйелдерге де, ерлерге де ортақ.

Қоғамдағы тең мүмкіндік әр адамның қабілетін толық көрсетуіне жол ашады. Әйелдердің басқару мен кәсіпкерлік саласындағы жетістіктері — тек жеке табыс емес, қоғамның дамуына қосылған үлес.Сондықтан әйел көшбасшылығын қолдау — тұрақты әрі әділетті қоғам қалыптастырудың маңызды бөлігі.

Journiverse халықаралық журналистика мектебінің оқушысы: Сұлтания Айшабибі