Қазақ ұлттық қыздар педагогикалық университеті: дәстүр сабақтастығы мен заманауи білім үндестігі.

Алматы қаласы

Жетекші:Қоштыбаев Талғат Бектасұлы                                                                                                                                                            физика‒математика ғылымдарының кандидаты, Қазақ ұлттық қыздар педагогикалық университеті физика кафедрасының профессоры м.а.

Автор:Сабит Назгүл                                                                                                                                                                                          Сайлаухан Самалхан                                                                                                                                                                                        Сұлтанбек Нұрай

Қазақ ұлттық қыздар педагогикалық университеті, 6В05302–Физика мамандығының 3 курс студенттері                                              Қазақ ұлттық қыздар педагогикалық университеті: дәстүр сабақтастығы мен заманауи білім үндестігі.

Университеттің бірегейлігі мен миссиясы           

                                                                                                                                                                                                                                 Қазақ ұлттық қыздар педагогикалық университетінің бас ғимараты. Алматы қаласы.                                                                                    1940-жылдары Қазақстанның ауылдық аймақтарында педагог мамандарға деген сұраныс жоғары болды. Соғыс жылдарында көптеген ер азаматтың майданға аттануы білім беру саласындағы кадр тапшылығын одан әрі күшейтті. Әсіресе ауылдық жерлердегі қазақ қыздарының жоғары білім алуы өзекті мәселелердің біріне айналды. Бұған әлеуметтік жағдай, тұрмыстық қиындықтар, оқу орындарының шалғай орналасуы және сол кезеңдегі қоғамдық көзқарастар әсер етті. Осы мәселелерді шешу мақсатында қазақ қыздарына арнайы жоғары педагогикалық білім беретін оқу орнын ашу қажеттілігі туындады.                                                                                                       1944 жылғы 15 тамызда Қазақ КСР Халық Комиссарлары Кеңесінің №457 қаулысы негізінде құрылған оқу орнының ашылуына 1938–1951 жылдары Қазақ КСР Халық Комиссарлары Кеңесін басқарған Нұртас Оңдасынов ықпал еткен. Осылайша, қазақ қыздарының жоғары білім алуына жол ашқан білім ордасының тарихы басталды.                                                                                                             Қазақ ұлттық қыздар педагогикалық университетінің басты ерекшеліктерінің бірі – білім берумен қатар, студент қыздардың әлеуметтік жағдайына ерекше көңіл бөлінуі. Соның бір дәлелі – 1944 жылдан бері жалғасып келе жатқан ай сайынғы тамақтану ақысы. Алғашқы жылдары бұл қолдау студенттерге азық-түлік және ыстық тамақ түрінде көрсетілсе, кейіннен олардың қажеттілігі мен ыңғайына қарай ақшалай төлем түріне ауыстырылды.                                                                                                                                                Университеттің негізі қаланған уақыттан бері сақталып келе жатқан бұл дәстүр қыздардың білім алуына қолайлы жағдай жасауға бағытталған қамқорлықтың көрінісі болып табылады. Осындай әлеуметтік қолдаудың бүгінгі күнге дейін жалғасуы оқу орнымыздың өзіндік ерекшелігін айқындай түседі.                                                                                                                                                        Университетіміздің миссиясы: Білім беру саласында еліміздің және әлемнің игілігі үшін озық білім мен құндылықтарды жасай, дамыта және тарата алатын көшбасшы ұстаздарды қалыптастыру.       

Білім сапасы және академиялық артықшылықтар                                                                                                                                       Қазақ ұлттық қыздар педагогикалық университетінің білім беру жүйесінде теориялық дайындықпен қатар, студенттердің кәсіби қабілеттерін дамытуға да көңіл бөлінеді. Әртүрлі білім беру бағыттарын қамтитын институттардың болуы қыздар қауымына өз қызығушылығы мен қабілетіне сәйкес мамандық таңдауға жағдай жасайды.                                                                                                  Білім сапасының қалыптасуында профессор-оқытушылар құрамының орны ерекше. Оқу орнымызда ғылыми дәрежесі бар профессорлар, PhD докторлары мен тәжірибелі оқытушылар қызмет атқарады. Олардың ғылыми ізденістері мен кәсіби тәжірибесі студенттердің пәнді терең меңгеруіне, зерттеушілік дағдыларын қалыптастыруына және болашақ мамандығына жауапкершілікпен қарауына ықпал етеді.                                                                                                                                                                                             Оқу үдерісінде студенттердің тек дайын ақпаратты қабылдауымен шектелмей, өздігінен ізденуіне және алған білімін тәжірибеде қолдануына мән беріледі. Мұндай оқыту тәсілі болашақ мамандардың сыни ойлауын, шығармашылық қабілетін және кәсіби құзыреттілігін дамытуға бағытталған. Университеттің қазіргі білім беру жүйесіндегі орнын ұлттық және халықаралық рейтингтерден де байқауға болады. 2025 жылғы ресми мәліметке сәйкес,ҚазҰҚПУ Аккредиттеу және рейтингтің тәуелсіз агенттігінің ұлттық рейтингі бойынша 7-орынға ие болып, бағалауға ұсынылған 45 білім беру бағдарламасының 25-і алғашқы үштікке енген. Ал 2026 жылғы 3 қарашада жарияланған ақпарат бойынша, QS World University Rankings: Asia 2027 рейтингінде университет 791–800 орындар аралығында көрсетілген. Бұл нәтижелер оқу орнының білім беру бағдарламаларын жетілдіру және халықаралық академиялық беделін арттыру бағытындағы жұмыстарының көрсеткіші деуге болады.

 Ғылыми әлеует және инновациялар                                                                                                                                                       ҚазҰҚПУ-дың тағы бір артықшылығы – теориялық білімді тәжірибемен ұштастыруға бағытталған заманауи оқу ортасы. Бүгінде күнделікті сабақтарымыз дәстүрлі оқыту әдістерімен ғана шектелмей, жаңа технологияларды қолдану арқылы толықтырылып отырады.Атап айтқанда, физика және жаратылыстану бағытындағы пәндерді меңгеру барысында PHYWE, PASCO зертханалық құрылғыларын, 3D принтерлер мен робототехникаға арналған практикалық жабдықтарды пайдалануға мүмкіндігіміз бар. Бұл құралдар ғылыми заңдылықтарды теория жүзінде түсінумен қатар, оларды тәжірибе арқылы зерттеуге, бақылауға және алынған нәтижелерге сүйене отырып қорытынды жасауға көмектеседі.Мұндай практикалық сабақтар күрделі физикалық құбылыстарды тереңірек түсінуге жол ашып, ғылымға деген қызығушылығымызды арттырады. Әсіресе болашақ педагог ретінде зертханалық құрылғылармен жұмыс істеуді меңгеруіміз алдағы кәсіби қызметімізде маңызды тәжірибе болмақ.Білім алушылардың жан-жақты дамуына арналған IT зертханалары мен медиастудиялардың болуы да оқу үдерісінің мүмкіндіктерін кеңейтеді. Бұл орталар студенттердің ақпараттық технологияларды меңгеруіне, шығармашылық жобалар дайындауына және заманауи цифрлық құралдармен жұмыс істеу дағдыларын қалыптастыруына жағдай жасайды.                                                                                                                                                                                                   Жеке тәжірибемізден мысал келтіретін болсақ, Қоштыбаев Талғат Бектасұлының Coursera халықаралық білім беру платформасы арқылы «Механика» пәнін оқу мүмкіндігіне ие болдық. Бұл біз үшін пән бойынша қалыптасқан білімімізді толықтырып, халықаралық деңгейдегі оқу материалдарымен танысуға жасалған маңызды қадам болды. Аталған тәжірибе өз бетімізше ізденуге, жаңа білім көздерін пайдалануға және ғылымды тереңірек меңгеруге деген құлшынысымызды арттырды.                  

Студенттік өмір және инфрақұрылым

Сералы Қаниев атындағы кітапхана.                                                                                                                                                  Университеттің студенттерге ұсынатын маңызды мүмкіндіктерінің бірі – Сералы Қаниев атындағы ғылыми кітапхананың заманауи білім беру кеңістігі ретінде қалыптасуы. Бұл кітапхана қажетті әдебиеттерді алып, сабаққа дайындалатын орын ғана емес, білім алушылардың ғылыми ізденісін қолдайтын және өздігінен дамуына жағдай жасайтын орталық болып табылады. Мұндағы 1 миллионнан астам кітап қоры түрлі ғылым салалары бойынша білімімізді тереңдетіп, зерттеу жұмыстарына қажетті ақпарат көздерін табуға жол ашады. Кітапхананың заманауи технологиялармен жабдықталуы дәстүрлі кітап оқу мен цифрлық білім алу мүмкіндіктерін өзара ұштастырады.

2024 жылы жаңғыртудан өтіп, жаңа үлгіде ашылған кітапханада студенттердің қолайлы жағдайда білім алуына қажетті инфрақұрылым қарастырылған. Атап айтқанда, екі оқу залы, конференц-зал, Академиялық жазылым орталығы, топтық жұмыстарға арналған бөлмелер мен жеке ізденуге мүмкіндік беретін 14 оқу кабинасы бар. Бұдан бөлек, 20 орындық компьютер сыныбы, электрондық ақпараттық ресурстар және кітаптарды өз бетінше пайдалануға арналған RFID технологиялары білім алу үдерісін жеңілдете түседі.

Ерекше назар аударуға тұрарлық тағы бір жағдай – инклюзивті  беруді қолдауға арналған ассистивті технологиялар кабинетінбілімің болуы. Бұл ерекше білім беру қажеттіліктері бар студенттердің ақпараттық ресурстарды пайдалануына және білім алуына қолайлы орта қалыптастыруға бағытталған. Қазақ ұлттық қыздар педагогикалық университетінде студенттердің қоғамдық белсенділігі мен тұлғалық дамуына ерекше көңіл бөлінеді. Бүгінде оқу орнында 18-ден астам студенттік ұйым мен клуб жұмыс істейді. Атап айтқанда, «Парасатты НЛО» пікірсайыс клубы шешендік өнер мен сыни ойлауды дамытуға, «Ақ қауырсын» әдебиетшілер клубы шығармашылық қабілеттерді жетілдіруге, ал «Enactus QYZPU» кәсіпкерлік және әлеуметтік жобаларды жүзеге асыруға бағытталған. «Ашық жүрек» волонтерлік ұйымы студенттерді қайырымдылық пен қоғамдық жауапкершілікке баулиды.2026 жылы құрылған «Студенттік құрылтай» білім алушылардың ұсыныстарын университет басшылығына жеткізіп, олардың маңызды шешімдерді талқылауға қатысуына жағдай жасайды. Осындай ұйымдардың қызметі студенттердің көшбасшылық, ұйымдастырушылық және қарым-қатынас дағдыларын қалыптастырып, болашақ педагог ретінде жан-жақты дамуына ықпал етеді.

Түлектердің жетістіктері және мансаптық мүмкіндіктері                                                                                                                             Қазақ ұлттық қыздар педагогикалық университетінің білім беру сапасын айқындайтын негізгі көрсеткіштердің бірі – түлектерінің еңбек нарығында өз орнын табуы және кәсіби салада жетістікке жетуі. Университет қабырғасында алған білімнің нәтижесі диплом алумен ғана шектелмей, болашақ маманның еңбек жолында қаншалықты сұранысқа ие болуымен де өлшенеді.Бұл бағытта оқу орнымыздың нақты нәтижелерін атап өтуге болады. 2024 жылғы 7 ақпанда жарияланған ресми мәліметке сәйкес, Қазақстан Республикасы Ғылым және жоғары білім министрлігі мен «Атамекен» Ұлттық кәсіпкерлер палатасының тәуелсіз бағалау нәтижесінде Қазақ ұлттық қыздар педагогикалық университеті түлектердің жұмысқа орналасуы бойынша ұлттық жоғары оқу орындары арасында 89,23% көрсеткішпен көш бастаған. Бұл дерек университетте даярланған мамандардың еңбек нарығындағы мүмкіндіктерін сипаттайтын маңызды көрсеткіштердің бірі болып саналады.                                                                                                                                                                           Түлектеріміздің академиялық жетістіктері де назар аударуға тұрарлық. Университеттің ресми ақпараты бойынша, 2024–2025 оқу жылында бес институт бойынша 1 536 түлек жоғары білім туралы диплом алып, олардың 421-і үздік диплом иегері атанған. Ал 882 студент мемлекеттік білім гранты негізінде оқуын аяқтаған. Аталған нәтижелер білім алушылардың оқу барысындағы еңбегі мен академиялық жетістіктерін көрсетеді.                                                                                                                                                                   Жас мамандардың еңбек жолын бастауына қолдау көрсету мақсатында университетте бос жұмыс орындарының жәрмеңкелері ұйымдастырылып келеді. Соның бірі – 2024 жылғы 20 мамырда өткен «JOB FAIR – 2024» шарасы. Мұндай кездесулер студенттер мен жұмыс берушілер арасында тікелей байланыс орнатып, түлектердің кәсіби мүмкіндіктерімен танысуына және болашақ қызметін жоспарлауына көмектеседі.

Халықаралық ынтымақтастық

Хатай Мұстафа Кемаль университеті.Түркия.

Қазақ ұлттық қыздар педагогикалық университетінің даму бағыттарының бірі – халықаралық академиялық байланыстарды кеңейту және студенттердің шетелдік жоғары оқу орындарында білім алуына жағдай жасау. Бүгінде университет 58-ден астам шетелдік жоғары оқу орнымен халықаралық ынтымақтастық орнатып, академиялық ұтқырлық пен қосдипломды білім беру бағыттарын дамытуда.                АҚШ-тың Миссисипи алқабы мемлекеттік университеті, Польшаның Катовицадағы Силезия университеті, Түркияның Нийде Өмер Халисдемир университеті және Хатай Мұстафа Кемаль университеті, Қытайдың Хубэй университеті, Францияның Перпиньян университеті және Оңтүстік Кореяның Сунгшин университеті сияқты жоғары оқу орындарымен академиялық байланыстар қалыптасқан.Бұл ынтымақтастық аясында студенттер шетелдік университеттердің білім беру жүйесімен танысып, халықаралық тәжірибе жинақтай алады. Академиялық ұтқырлық бағдарламалары белгілі бір мерзімге басқа елде білім алуға бағытталса, қосдипломды бағдарламалар тиісті талаптарды орындаған жағдайда екі жоғары оқу орнының дипломын иеленуге жол ашады. Халықаралық ынтымақтастықтың нақты нәтижелерінің бірі ретінде 2026 жылғы 3 қыркүйекте жарияланған ресми ақпаратты атап өтуге болады. Онда 193 ҚазҰҚПУ студентінің шетелдік университеттерде білім алуы жоспарланғаны хабарланған. Бұл көрсеткіш академиялық ұтқырлық бағдарламаларының студенттер үшін нақты білім алу мүмкіндігіне айналып отырғанын аңғартады.                                              Академиялық ұтқырлықтың маңызы тек шетелге барып білім алумен шектелмейді. Өзге мемлекеттің мәдениетімен танысу, шет тілін жетілдіру, жаңа ортаға бейімделу және әртүрлі оқыту әдістерін салыстыру – болашақ маманның жан-жақты қалыптасуына әсер ететін тәжірибелер. Мұндай халықаралық бағдарламалар бізді білімімізді тереңдетуге, жаңа мүмкіндіктерді пайдалануға және кәсіби тұрғыдан дамуға ынталандырады. Әсіресе болашақ педагог ретінде шетелдік білім беру тәжірибесімен танысуымыз алдағы қызметімізде жаңа әдістерді қолдануға негіз бола алады.

Қорытынды

Қазақ ұлттық қыздар педагогикалық университетінің ерекшелігі оның тарихи қалыптасу жолымен ғана емес, сол дәстүрлерді бүгінгі білім беру талаптарымен ұштастыра білуімен де айқындалады. 1944 жылы қазақ қыздарының жоғары білім алуына жол ашу мақсатында құрылған оқу орны бүгінде білім, ғылым және халықаралық ынтымақтастық бағыттарын қатар дамытып келеді.Студенттерге көрсетілетін әлеуметтік қолдау, заманауи зертханалар, ғылыми кітапхана, білікті оқытушылар құрамы және халықаралық білім беру                 бағдарламалары – мұның барлығы сапалы білім алуға жасалған жағдайлардың бір бөлігі.Біз үшін университеттің құндылығы оның атауында немесе рейтингтегі орнында ғана емес, осы мүмкіндіктерді пайдалана отырып, болашақ маман ретінде қалыптасуымызға жағдай жасауында. Өйткені білім ордасының басты жетістігі – өз саласын жетік меңгерген, ізденуге қабілетті және алған білімін қоғам игілігіне жұмсай алатын мамандарды даярлау.