Ақ ләйлек

Ақ дегелек немесе ақ ләйлек — әркімге бала кезден әдеби шығармалардан және суреттерден таныс бейне, биіктігі бір метрдей, қанаттарының ұшы қара, тұмсығы мен аяғы қызыл түсті ақ құс. Әуелде Оңтүстік Қазақстандағы сазды жерлерде кең таралған болатын. Қазір су жағдайының өзгеруіне және шөбі қалың таяз сулар мен шабындықтардың жоқ болуына байланысты, тіптен жоғалып кетті. Тек Оңтүстік Қазақстан, Жамбыл облыстарының кейбір жерлерінен кездестіруге болады. Дегелектер адамнан қорықпайды, үлкен ұя салады. Бұлар көп жылдар бойы бір ұяда қоныстайды, сондықтан осыған байланысты махаббат пен сенімділік туралы аңыздар туған. Дауысы жоқтың қасы, күй-ойнақ кезеңінде аталығы басын арқасына қойып, тұмысығымен жиі соғып, барабан даңғылығындай дыбыс шығарады, ол кәдімгідей қашықтықтан естіледі. Ұясында 3-6 кұңгірт ақ жұмыртқасы болады. Ақ дегелек тек жануар тектес қорекпен (ірі жәндіктер, бақа, кесіртке, балапандар және көжектермен) қоректенеді. Қазіргі кезде ақ дегелек өте сирек кездеседі.  Бұл құстың әрбір ұясын қорғауға алу қажет.

Әлеуметтік желілерде бөлісіңіз: