Серікзат Мақсұтұлы Дүйсенғазин Шығыс Қазақстан облысы, Аягөз ауданы, Тарбағатай ауылында туған. 1997 жылы Әл-Фараби атындағы Қазақ ұлттық университетінің филология факультетін, 1999 жылы "әдебиеттану" мамандығы бойынша магистратурасын бітірген. 1999-2002 жылдар аралығында ҚазҰУ-дың Студенттер клубының директорының орынбасары, директоры, Ө.Жолдасбеков атындағы Студенттер сарайы директорының орынбасары қызметтерін атқарған. 2002 жылдан бүгінгі күнге дейін Л.Н.Гумилев атындағы Еуразия ұлттық университеті қазақ әдебиеті кафедрасында доцент, 2006 жылдан ЕҰУ-да филология факультеті деканының орынбасары қызметін атқарады. Филология ғылымдарының кандидаты, Республикалық айтыстардың жеңімпазы, республикалық жыр мүшәйрасының жүлдегері. Бір оқулықтың, бір ғылыми монографияның, отызға жуық ғылыми мақаланың, көптеген публицистикалық мақалалардың авторы, Бірнеше әдеби, ғылыми-танымдық жинақтардың құрастырушысы. Әнші М.Беспаевтың орындауындағы "Сен үшін жаралғандаймын", "Түнгі сыр", "Сүйіктім" әндерінің, "Ақиқат нұры", т.б. ел ішінде танымал әндердің мәтіндерінің авторы. Топтама өлеңдері бірнеше жыр жинақтарында, республикалық әдеби басылымдарда жарияланған.