Ақсәуле қайтқанда – Сапарғали Бегалин

Ақсәуле, сенен бөліндім,
Қайтадан қашан көрермін,
Қызықты сәтін өмірдің
Тез болсын тағы көрер күн.
Қош айтқанда назбенен,
Телміре терең қарадың,
"Аққу ем келген жазбенен
"Күзбен" деп "қайтып барамын".
Келгенің қандай керемет
Із қалдырды жүректе,
Кіршіксіз мөлдір таза ниет,
Жүректе мәңгі жүреді те.
Сипатыңды, сырыңды
Қосты екен қалай табиғат,
Қабылдармысың жырымды,
Мазмұны ортақ, тілі жат.
Көкейде көп сыр бар еді,
Айта алмадым жеткізіп,
Тағдыр сұм қандай тар еді,
Тоқтатпай күнді өткізіп,—
Айырды бізді алысқа,
Көкірекке түйреп күйініш,
Қарышта, сабыр қарышта,
Алдыңнан тосып сүйініш.

1937