Өпіремдеу тыныстайтын әр демін – Айтуар Өтегенов

Өпіремдеу тыныстайтын әр демін,
Керек жерде аямайтын жәрдемін.
Менен гөрі думанқойлау, серілеу,
Бала күннен сырлас досым бар менің.
Рас жаны ұлы еңбектен қашпайды,
Өзгелердей абыржып та саспайды.
Асауларды ұстағанда құлақтан,
Тыпырлатпай тастайды.
Қысқа айтқанда іс келеді қолынан,
Жас жігерін өткірлікке жаныған.
Жанарымен өртеп қыздар жүрегін,
Той-жиында отырады салып ән.
Бірге өскен тай жалына жармаса,
Берсін деймін сапарымыз жалғаса.
Досым менің жақсы жігіт тек әттең,
Кей кездерде өзімшілдеу болмаса.