Жоғалтқаның өзіңді – Айтуар Өтегенов

(Немерем Қабидошқа)

Алдыңда жар,
Бар үңгір,
Жұтар,
Мейлің темірсің.
Өзге тілдің бәрін біл,
Өз тіліңмен өмір сүр.
Еріп кетпе дүрмекке,
Тосар тағдыр небір сын.
Өзге тілді құрметте,
Өз тіліңмен өмір сүр.
Бақшаңдағы гүліңді
Солдырма,
Бол төзімді.
Жоғалтсаң өз тіліңді,
Жоғалтқаның өзіңді.

(немерем Ферузаға)
Ләззатқа бөлеп дәйiм бал күлкiң,
Тұруға ерте, жүруге ерте талпындың.
Өскенiңде, өскенiңде, құлыным,
Қамын ойлар аруы бол халқыңның.
Құйттай ғана балапаны ұяның,
Жанарыңа тек жақсылық құя бiл.
Дүниенiң сен бiлмейтiн сыры көп,
Шарықтасын шартарапқа қиялың.