Өлең, жыр, ақындар

Менің заңым

  • 30.07.2019
  • 0
  • 0
  • 1135
Дүбірлі дүниеге ғашық болып,
Жетпістің жотасынан асып қонып,
Мақтансам бүгін ерен тасып-толып –
Ол менің бекітілген Заңым болып.
Қаптатып қыр төсінде отарымды,
Шабытпен шырқап шаттық от әнімді,
Айрықша аяласам Отанымды –
Ол менің бекітілген Заңым болып.
Ардақтап жанұямды, жас баламды,
Кеңейтсем күмбірлетіп баспанамды,
Бақытты шырағымды жақсам мәңгі –
Ол менің бекітілген Заңым болып.
Қалаған мамандықты таңдар болсам,
Ғылымның әр саласын аңдар болсам,
Өнерде өрен жүйрік, заңғар болсам –
Ол менің бекітілген Заңым болып.
Көсіліп, сөйлер сөзге батыл болып,
Жырласам заманымды ақын болып,
Самғасам күн көзіне жақын қонып –
Ол менің бекітілген Заңым болып.
Саралап бөліп жатпай реңімді,
Білекпен айқастырып білегімді,
Жандарға жарып берсем жүрегімді –
Ол менің бекітілген Заңым болып.
Жер жыртып, жарқыратып түренімді,
Түлетіп ой менен қыр, түбегімді,
Ақтарсам ел алдында тілегімді –
Ол менің бекітілген Заңым болып.
Атқарып сан алуан жұмыстарды,
Балқытып болат пенен құрыштарды,
Толтырсам алтын дәнге уыстарды –
Ол менің бекітілген Заңым болып.
Еңбекте ерлігімді халқым көріп,
Көңілім көтеріңкі, жарқын болып,
Кеудемде жарқыраса алтын болып –
Ол менің бекітілген Заңым болып.
Үлгі етіп еңбегімді басқаларға,
Өмірдің арнасымен ақсам алға,
Демалсам сәнді сарай, бақшаларда –
Ол менің бекітілген Заңым болып.
Ағарып сақал-шашым, қартайғанда,
Бойымнан қуат-күшім, әл тайғанда,
Теңесіп, құрметтелсем Алтайларға –
Ол менің бекітілген Заңым болып.
Арналып Отаныма бар ізгі әнім,
Өмірлік орындалып парыздарым,
Қорғалса абыройым, ар-ұжданым –
Ол менің бекітілген Заңым болып.



Пікірлер (0)

Пікір қалдырыңыз

Кезекші

  • 0
  • 0

Ерте тұрып әр таңда,
Сыныбыма келемін.
Сүртіледі партам да,
Жуам тақта, еденін.

Толық

Қырқылған көше

  • 0
  • 0

Алматы сәнді несімен?
Алматы мәнді несімен? –
Әрине, оқтай түп-түзу
Көшелерімен көсілген.

Толық

Арыстан мен түлкі

  • 0
  • 0

Түлкі бұрын Арыстанды көрмеген,
Көргенде алғаш аз-ақ қана өлмеген.
Кейінірек жанап барып жақындау,
Болып алды бұрынғыдан батылдау.

Толық

Қарап көріңіз

Басқа да жазбалар