Әйел құдіреті

Бас иемін қашанда әйелге мен,
Соғып тұрған жүрегім әйел дер ем.
Құдіретті кім десе бұл әлемде,
Сұлу болып жаралған әйел дер ем.
Жаулап алдың сен мені, жаулап алдың,
Жүрегімді біржола баурап алдың.
«Жаратпаймын мен сені» десең-дағы,
Басы бүтін бітіспес дауға қалдың.
Білемісің сен соны, білемісің?
Бұл сөзіме құлақты түремісің?
Біреулердің қайғысы, қасыреті,
Біреулердің таяныш-тірегісің.
Артық болмас асыра мақтағаным,
Сенен артық аруды таппағанмын.
Иба менен керемет келбетіңді
Кір түсірмей мәңгілік сақта, жаным.

---