Әке туралы

Бітпейтұғын күнделікті күйбеңмен,
Жүрген әкем бейнет көрген,сый көрген.
Одан мынау жақсылықты ұғынғам,
Одан мынау адалдықты үйренгем.

Кезі болса бір байламға тоқтаған,
Оның айтқан ақылынан аттаман.
Менің әкем сабырлы да,байсалды,
Менің әкем қайратты да,отты адам.

Түстім-ау деп бабам салған жолға әрең,
Жүзіп келем әкем салған арнамен.
Бола алам ба ол үшін мен лайықты ұл,
Жаза алам ба ол үшін мен жанды өлең?

Қылауланған самайынан жылдардың,
Өкінішін,мұңын көріп мұңдандым.
Сөзінде оның табы бар ғой ескінің,
Көзінде оның сағынышы қырлардың.

Жасаса да өз дегенін сырғып күн,
Бағынбаған,алынбаған шын мықтым.
Мен әкемнен әнін ұқтым жастықтың,
Мен әкемнен мәнін ұқтым тірліктің.
Солай!

---