Алаштың арыстары – Шаймарданова Нұргүл

Арыстары Алаштың төске өрлеген,
Ата үмітін жақпақ боп өскен өрен.
Сол жолдың шырақшысы Әлиханды,
Қазақтың көшбасшысы, көсем дер ем.

Өнер-білім бар жұрттан қалыспаған.
Бос іске, өнбес шартқа жарыспаған,
Бірі – өнер, бірі –ғылым, бірі-тарих,
Кезі еді ол надандық алыстаған.

Жақсысы ұлтымның жұлдыздары,
Рухыменен демеген ұл қыздарды.
Қаралыққа құмартқан сол үкімет,
Даралыққа мойныңды бұрғызбады.

Күн сөнгенше сөнбен деп ұрандаған.
Жұртына жалынды жыр арнаған,
О, баба, бүгін көрем кескініңді
Күн астында самғаған қырандардан.

Тәуелсіздік тәтті сый, тілек те егемендік,
Ол сыйға не қымбатты тең көрмедік.
Көрер таңға қалтқысыз сендің дағы,
Бұл жолда таныттың көрегендік.

Жаңғырып тау-елімнің жақпарлары,
Тіл көзден қорған сұрап сақтанады.
Тәңіріне тәубе дер ұлт болашақтан,
Өткенін ұлықтаса бақ табады.