Анам барда...

Анам барда жайқаламын ,гүлденем,
Анам барда қуанышты күйге енем,
Анам барда сезілмейді ауырлық
Анам барда алып ұшам үйге мен.

Менің анам-ерекше жан өзгеден,
Айтқызбай – ақ түсінетін көзбенен,
Менің анам жарқын жүзді ақкөңіл
Тез арада тіл табысар өзгемен.

Анам барда әлі бала сияқтымын,
Анам маған нұрын шашқан шуақты күн,
Анам барда еркелеймін мен оған
Анам барда шаршамаймын,қуаттымын.

Анам барда көңілім жаз жайнаған,
Қамымды әркез уайымдап ойлаған,
Баласы үшін баз кешетін анадан
Артық адам жер бетінде болмаған.

Маған жарық дүниені сыйлаған,
Менің анам-құрметке лайық ,сыйлы адам,
Мен анаммен мақтанамын қашанда
Балаларын жамандыққа қимаған.

Жүрегіңнен мейірімге толы айналам,
Саған қарап,бой түзеймін үлгі алам,
Ақ сүтіңе ақ тілекпен жауабым-
Аман жүрші,ауырмашы сен Анам!

---