Альбом – Маржан Аккаюова

АЛЬБОМ
Қолыма түсті альбом түрі әдемі,
Ескіріп қалыпты ғой біраз жері.
Суреттерді ап қалыппын тастамай,
Өйткені ол өткен күннің куәгері.

Куәгері ол шынайы шаттықтың,
Ойламаушы ек қиындығын әр түптің.
Өмір үшін күреспеген бейкүнә,
Белгісі тұр тазалық пен пәктіктің.

Куәгері балалық пен жастықтың,
Сол күнде мен кімге, қайда асықтым.
Балалықтың бір қадірін білместен,
Ересектер өміріне бас сұқтым.

Болмап едік дәл бүгіндей төзімді,
Аяқ асты көріп бала кезімді.
Суреттерге көз жүгіртіп елжіреп,
Ойламаппын сағынам деп өзімді.

Сағыныппын суреттегі жиырманы,
Бұл әлемді жамандыққа қимадым.
Бейне бәрі ғаламның бар жақсысын,
Бөліп-жармай маған ғана сыйлады.

Бұл суретті еске аламын көз іліп,
Солдаттарша тұра қаппыз тізіліп.
Кім ойлаған кетеміз деп бытырап,
Монашақтардай қалған жолда үзіліп.

Сол күндерге ғашықпын мен, о тоба,
Күресу де, таласу да жоқ о да.
Тағдырынан хабары жоқ қыздардың,
Аңқау қалпы сақталыпты фотода.

Жүруші едік базарында бақыттың,
Ойнаушы едік күш-қайратты сарқып тым.
Сол күндерді қайтарып-ақ алар ем,
Болса егер машинасы уақыттың.

Байқатпай-ақ алып шығар тар жолдан,
Сүйінетін сүйінішім бар болған.
Ең алаңсыз күндерімді осылай,
Анда-санда көріп тұрам альбомнан.