Ашамай

- Таралғысы тым қысқа,
Ерге ұқсас бұл нұсқа –
Ашамайың, мінеки, -
Деп әкеліп берді ұста.

Түсіне алман мәнін көп,
Бәрі жұмбақ көрінбек.
Жымияды атам жай:
- Ашамайың керім! – деп.

Ер жолымен бабаның,
Салтыменен даланың,
Атам арнап жасатқан
Ері екен бұл баланың.

- Торы тайыңды ерттейміз,
Жолға ешкімді ертпейміз.
Алла жазса, - дейді атам, -
Көрші ауылға беттейміз.

Жайын ойлап атымның,
Басымды оймен қатырдым.
Түніменен дөңбекшіп,
Таңды әзер атырдым.