Аптапта – Сайын Назарбекұлы

Кездестірмей бұрын мұндай аптапқа,
Жүр екен-ау құдай талай сақтап та.
Туған жердің табиғаты ғажап деп
Өжектескем талай қорғап, жақтап та.
Кетеді екен ми дегенің былқылдап,
Көз қарайып, көмей кеуіп, үнсіз ғап.
Е батырым, астаналық, қалай деп,
Құрдас қатын әзілдейді, сылқылдап.
Жаңа үйленген жас жігіттей, ғажап-ай –
Көптен бері кешті асыға күткенім.
Әзіл аптап – о да жанды мазалай,
Күйіп-жанам, шыдамды едім, мықты едім.
Адал кісі атанған ем мен деген,
Көзге түскем батылдықпен, ерлегем.
Арамдығым, өзім сезбес, болса егер
Кетсе, шіркін, осы шыққан терменен.