Мен ұқыпты баламын – Серік Әкірамұлы

Кітап, дәптер, қаламым,
Сөмкеме оны саламын.
Күтетін оқу құралын,
Мен ұқыпты баламын.
Қалам алып қолыма,
Жазам дәптер жолына.
Қызыл, қара, көк қалам,
Менде сондай көп қалам.
Сұрағанда мұғалім,
Дайын оқу құралым.
Кітап, қалам, дәптерді,
Түгендеп күнде тұрамын.
* * *
Тұра салып тісімді,
Тап-таза қылып жуамын.
Көбейтем деп күшімді,
Жаттығу жасап тұрамын.
* * *
Әдебімді білемін,
Жамандықтан шектеймін,
Киімімді ілемін,
Шашып тастап кетпеймін.
* * *
Жарықты да сөндірем,
Суды барып тексерем.
Бұдан былай енді мен,
Үнемдеуді ескерем.
* * *
Айтқан ақылды ұғамын,
Жылы киім киінем.
Шат көңілмен шығамын,
Күнде ертең үйімнен.
* * *
Күнде кітап оқимын,
Нақыл сөзін теремін.
Көкейіме тоқимын,
Ұмытпаймын дерегін.
* * *
Бағып-қаққан ата-анам,
Үміті ертең ақталар.
Мықты азамат атанам,
Бүкіл қазақ мақтанар.

(балаларға арналған тақпақ)