Бәйге – Серік Әкірамұлы

Тайбурылдай жараған,
Жал-құйрығын тараған,
Жүйріктер тұр тыпыршып,
Арғымаққа балаған.
Міне, бәйге басталды,
Шабандозым, бас қамшы!.
Делебесі қозады,
Бәйге десе жас-кәрі.
Қиқулаған дауыстар,
Жаңғыртады аспанды.
Таң асырып бапталған,
Кіл сәйгүлік мақталған.
Шықты әне бір тұлпар,
Қара үзіп аттардан.
* * *
Тұлпарлар жарысқан,
Бәйге – сын, бәйге – үміт,
Ауыздықпен алысқан,
Қанатты сәйгүлік.
Қиқулап, қан қызып,
Делебең қозады.
Бәйгеде бар қызық,
Шын жүйрік озады.
Жұлдыздай ағады,
Бабамның күлігі.
Оятқан Даланы,
Арғымақ дүбірі.
Шап, шап, шабандоз!
Жүрмесін шет қалып.
Көсілсін тарланбоз,
Мәрені бетке алып!.

(балаларға арналған тақпақ)