Екі қаз

Көліме былтыр ерте қонып ең, екі қаз,
Көлімнің бетін күлімсіреткен екі қаз,
Кешіктіңдер ғой, сыңайы салқын аспанның,
Жылым сулардың болғаныменен беті жаз.
Кешігіп биыл талықсып ұшып келгенде
Тәнті етер сыйлық таба алмай жүрмін сендерге.
Көк құрақтарын көп орып едік өткен жаз,
Қарсы алар ма екен жатырқап жайдақ көлдер де?
Көк аспаныңның кеңістігіне тайғанап,
Аққуларменен араласып кел ай қабақ.
Жалаңаш көлдерді айналып өтіп қаңқылда,
Қаңқылдаңдаршы, қонысым менің қайдалап.

---