Әпкенің туған күніне арнау – Абдулмахмуд Пошатаев

Қара қыз, бауыр үшін аппақ айсың.
Тілегімді жаныңда сақтағайсың.
Алтын асық ұлдарың, жауқазын қыз,
Мамасының сенімін ақтағайсың.
Тектілер айтады екен тілекті үміт.
Белді бекем буғайсың, білек түріп.
Бауыр үшін жан берер алтын әпкем,
Арқасын ағайынға тіреп тұрып.
Жалған айтсам, сенер кім, иланар кім?
Қадірін түсірмеген жиған ардың.
Әпкесіндей азамат болсыншы деп,
Алланың Баймұратты сыйлаған күн.
Ақысын берген жанмын, төлеп қалған.
Бұл күннің қадірі асқақ, бөлек маған.
Бауырым мен баламның туған күні,
Көңілді көтеруге себеп маған.
Кездерім еске түсіп сол шақтағы.
Көзімнің домалайды моншақтары.
Анам мен келінінің бір күнде екен,
Бірі қызды, бірі ұлды толғатқаны.