А нүктесі – алданған ақ арманым – Құралай Омар

Бауыржан Қарағызұлына
А нүктесі – алданған ақ арманым,
Ә нүктесі – әттеңі көп жалғаным.
Б нүктесі... бақытымды іздеумен,
Ғ нүктесі... ғарыш жаққа самғадым.
Д нүктесі – дөңгеленген дүние,
Е нүктесі... еркімізге кім ие?
Ж нүктесі жолықтырмай бір жанға,
К нүктесі көкірекке мұң үйе
кете барды.
Қ нүктесі. Құладым.
Л нүктесі... лағыл жасты бұладым.
М нүктесі... мән таба алмай өмірден,
Н нүктесі... «неге?» болды сұрағым.
О нүктесі... ойым онға бөлінді,
Ө нүктесі өлшегенде сорымды.
П нүктесі – пәнидегі өкініш...
Р нүктесі... Рахымды Алла оңғара ма жолымды?
С нүктесі – сабыры бар жүрегім,
Т нүктесі – ақ таңдағы тілегім:
«Ү нүктесі... үзілмейтін үміт пен
Ш нүктесі, шыдам бер» деп жүремін.
...Көңілдегі күдігім мен секемім,
Мендік ғұмыр – тек менікі – жеке мұң.
Минут сайын қалтыратар жанымды
Алып ғалам алдында нүкте ғана екенім.