Табылды суретшіге – Қалампыр Кенжеғалиева

«Аяз би» деп ат қойыпсың
картинаңа тамаша...
Ашық аспан, шеберлік пен
қанық бояу жарасар.
Құдырет деп, сүгірет деп
Қылқаламның иесін
Мақтап тұрдық.
Еске алысып
тарих-тағлым үлесін...
«Жаманмын» деп таныстырған
Күс-күс аяқ қойшы өзін,
Өңшең уәзір құлақ асқан
Сөзін еске ал, ойша өзің...
Жаман болса, жаман болар,
Өрім-өрім киімі,
Қой соңында салпаңдаған
Келіспей тұр сиығы...
Хан сынаған сол Жаманды,
Жаман ханды сынайды.
Жеті атасын айтып берсе
Жаңылмаған сыңайлы!
Жаман-жұман сырт пішіні!
Би боп тынды ақыры ол,
Тым құпия ішкі сыры
Шын асылдың заты сол!