Барлығына кінәлі кім?

Барлығына кінәлі кім?
Мына мен!
Келе жатқан кешірумен,
Шыдаумен…
Біле тұра әлсіздігін шындықтың,
Көре тұра құрықтарын қулықтың.
Мен кінәлі емей бұған, енді кім?
Мен –
Жеңілдім!
Кінәлаңдар!
Сорға біткен бағыма,
Сына!
Міне!
Өштеріңді ал, тағы да!

Барлығына кінәлі –
Өзім,
Өзіммін!
Шайнай-шайнай
Шандырланған төзіммін,
Әйел емес,
Адуынды сезіммін,
Безіндірдім!
Безіндім!

…Кешіріңдер!
«Қылмысымды» ұқтым мен.
Қолдарыңнан келмейтінді күттім мен,
Ақырында,
Аңырақай шайқастан,
Жалғыз өзім
Зар еңіреп шықтым Мен!

Кешіріңдер!..