Кiсi жары – Исраил Сапарбай

«Кiсi жары кiсiге жар болмайды,
Балапандай баурыңа басқанменен...»
Халық əнi

Өте шығар бұл өмiр қас қағымда,
Ойнап-күлген жарасар жас шағыңда.
Кiсi жары кiсiге жар болады
Балапандай бауырыңа басқаныңда.
Күн қуанбас бұлт барда аспаныңда,
Жан жұбанбас жанарда жас барында.
«Кiсi жары кiсiге жар болмайды» –
Қандай сыр бар бұл сөздiң астарында?
Жанға серiк болса да жар, үй, бала..,
Қарай ма екен махаббат қағидаға?!
«Судан таза, сүттен ақ» кiм бар дейсiң,
Бұл жалғанда перiште – сəби ғана!
Аспандағы бiреу мəз айды алғанға,
Айналғанға бiреу мəз «пайғамбарға».
Ерте келiп өмiрден еншi алғанмен,
Кiсi жарын кеш көрсем, айлам бар ма?
Өңiнде емес, түсiнде көрiп Айын,
Кiмдер айтып өтпедi «Елiгайын?»...
Əмiрiне Алланың айлам қайсы –
Кiсi жарын ұнатсам, неғылайын?!
Адам жетер мұратқа, Алла оңдаса,
Ақ сағымды арман деп алданбаса.
Жақсылығын қайтейiн бұл жалғанның,
Кiсi жары кiсiге жар болмаса?!