Иса Байзақов

Бауырым Ахметжан!

Бұл бетте «Бауырым Ахметжан!» атты Иса Байзақов жазған бауыр туралы өлең берілген. Өлең мәтіні, текст, өлең жолдары және толық нұсқасын осы жерден оқуға болады.

22.11.2015
0
0
2241

Бауырым, денің сау ма, Ахметжан!
Халқыңды жауынгерім мақтандырған.
Жарың жайнап, бауырлар гүлдей күліп,
Жас қырандай түледі алтын анаң.
Ту тігіп, туған жерің Баянаула,
Шаттанып ер ұлына, аспандауда.
Масатпен жігерленед қазақ халқы
Оғыңның үнін естіп атқан жауға.
Жауынан жасқанған жан ер бола ма,
Еріне сүйінбеген ел бола ма,
Отан үшін, келешек бақыт үшін,
Отты бол, ер жүрек бол, қорғалама!
Орденің Жұлдыз, айға шағылысқан,
Сәулесі келіп түсед - бізге алыстан.
Сендерді қамтамасыз ету үшін,
Еңбекті үдетеміз жалықпастан.
Ақындар қаламынан бал тамызып,
Айтысып, шаруа, өндіріс күшін жазып,
Тылда да, майданда да шабыт беріп,
Кербез ән, күй сайрауда жаныңа азық.
Көп сәлем достарыңа ақын жаннан,
Шертілді жүрек қылы қуанғаннан,
Ерлерім! Жауды құртып, сау қайтыңдар,
Баса бер сағат сайын алға таман.

Шымкент. 10/1 1944 ж.

Бауырым Ахметжан Иса Байзақов Иса Байзақов өлеңдері

Пікірлер (0)

Пікір қалдырыңыз

Жиі қойылатын сұрақтар